’Inuk’ Oscarinnanniuttunut peqataanngitsuussaaq
Oscarinnanniuttunut nunanit allanit filmiliat pitsaanersaannut Kalaallit Nunaannit 'Inuk' peqataaffigineqanngitsuussaaq. Filmit toqqagaasinnaasut qulingiluaannanngorput
Kalaallit filmiliaat kingumut Oscarinnanniuttut akornanniissanngilaq.
Qaammatit matuma siorna aliikkutassiaralugu filmiliaq 'Inuk' kalaallit Oscarinnanniuttussanut toqqaasartuisa, 'Nunanit allanit filmilliat pitsaanersaannut' Hollywoodimi Oscarinik tunniussinissamut peqataasussatut innersuuppaa.
Filmakademimit ullumi filmit qulingiluat ingerlaqqittussatut toqqakkat saqqummiunneqartut akornanni 'Inuk' ilaanngilaq.
Qallunaat periarfissaqarput
Qallunaat filmiliaat ‘En kongelig affære’ peqataassaaq.
Filmi innersuunneqassanersoq januuaarip qulinganni paasinarsissaaq, taamanikkussaru filmit tallimaannaat ingerlaqqittussat saqqummiunneqassammata. Inuusiarsuit aappaagu februaarip 24-anni tunniussuunneqassapput.
‘En kongelig affære’ ilitsersorneqarpoq Nikolaj Arcel-imit aamma Mads Mikkelsenip nakorsaq Struensee pingaarnertut inuttaaffigaa.