KNI'p kontoa milliardimik ataatsimik imaqarpoq
KNI'p nammineq pigisai amerliartuinnarput - maanna 1.000.000.000 koruunit qaangerpaat
KNIp nammineq uninngasuutai amerlipput maanna milliardit sinnersimalerpai, KNR allappoq.
Piffissami 1. april - 30. september 2012, ingerlatsiviup 1,3 milliardit kaaviiaartippai ukiup affaani sinneqartoorutit 75 millioner koruuniullutik, tamatumalu nassataanik nammineq pigisat qaffariaateqarlutik.
Ingerlatsiviup ileqqaagaqarnissaa aamma piumasaqaataavoq, pisortaaneq KNR'imut oqarpoq.
- Missingersuutitigut angusanut tunngatillugu pitsanngoriaataasoq nukissiuutinut immikkoortortap immikkut ittumik isertitaqarfigineratigut anguneqarsimavoq, nioqqutissanillu siammarterinermi angusat missingersuutini naammaginartumik angusaqarfiullutik. Ilaatigut uuliasiornermut aatsitassarsiornermullu pilersuinermut atatillugu suliffeqarfiullu iluani nutarsaanissamut annertuumik aningaasaliisussaavugut. Taamaammat suliffeqarfiup aningaasaqarniarnikkut nukittuumik inissisimaannarnissaa pisariaqarpoq, Claus Jensen naqissusiivoq.
KNI immikkoortunut tallimanut agguataagaavoq tassaasut, Pilersuisoq, Polaroil, KNI Engros, pisisa.gl aamma toqoraavik Neqi.