Ujarassiorit ajugaasui toqqarneqarput
Aatsitassanik ujaasilluni unammisitsinermi Ujarassiorit ajugaasut pingasunngornermi toqqarneqarput. Nuummi innuttaasut ilaat akissarsiassat annersaat 55.000 koruunit pissarsiarai. Kina akissarsisinneqarnersoq allaaserisami paasiuk
120.000 koruunit akileraarutitaqanngitsut aatsitassanik ujaasilluni unammisitsinermi Ujarassiorit, ajugaasut pingasunngornermi saqqummiunneqarput. Unammisitsineq ukiuni 20-ni ingerlasimavo
Akissarsiassat annersaannik pissarsivoq Kenneth Kristansen, Nuuk. 55.000 koruuninik tunineqarpoq Kujataani Qassiarsummi ujarak nassaani nassiussimagamiuk. Savimminissaq tamatigoortoq sananeqaatit tunngaviinik arlalinnik pilik ajugaassutigaa.
- Nassiussaq taanna soqutiginaateqarpoq sananeqaatit tassani katitersimanerat pissutigalugu, nalinginnaannginnami qularnanngitsumik alkaline intrusioninit pinngorfeqarsimagunarluni. Nassiussamit takuneqarsinnaavoq Kujataani ittumi nunami, ujaqqanik alkalinenik aatsitassanik qaqutigoortunik akulinneq peqartoq, suli nalinginnaannginnerusunik soqutiginartunilli, namminersorlutik oqartussanit tusagassiivinnut nalunaarput.
Akissarsiassat nunamut tamarmut siammarput
Ukiqo manna akissarsiassat annersaasa tulliinik 25.000 koruuninik Evald Brønlund, Ittoqqortoormiineersoq pissarsivoq, ujaqqamik takuneqarsinnaasumik kuultimik akulimmik nassiussigami, Ittoqqortoormiit eqqaaneersumik siornatigut kuultimik nassaarfiusimanngitsumit.
Akissarsiassat annersaasa pingajuannik 10.000 koruuninik, inuit marluk pinnattut tassaapput Paulus-Isak Danielsen aamma Juliane Halsøe, Kullorsuaq. Taakkua nassiussaat savimminermik, vanadium, kobber, nikkel aamma koboltimik akoqarput.
5.000 koruuninnattut pingasut tassaapput Robin Nuko, Kulusuk, Johannes Kristensen, Upernavik, Jakob Petersen, Qasigiannguit aamma Therkild Hansen, Qaarsut.