Geus-imi siulittaasutut toqqagaasoq: Akisussaafferujussuaq
Geusip siulersuisuini siulittaasutut toqqagaaqqammisoq professor Minik Rosing, suliassani nutaaq nuannaarutigaa. Taassuma oqaatigaa akisussaaffik angisooq tigummisarilerlugu
Forskning og rådgivning om Grønlands geologiske undergrund er et stort ansvar, og der skal løses mange igangværende og nye samfundsopgaver for Danmark og Grønland.
Kalaallit Nunaata sananeqaataanik ilisimatusarneq siunnersuinerlu akisussaafferujussuupput maannakkullu Kalaallit Nunaanni Danmarkimilu inuiaqatigiinnut suliat ingerlareersut ingerlasussallu suliarineqassapput.
Taamak oqarpoq Geusimi siulittaasutut toqqagaaqammisoq - Geus, Danmarkip Kalaallit Nunaatalu sananeqaataanik naalagaaffiup misissuisitsiviani, professori Minik Rosing Sermitsiaq.AG'mut oqarpoq.
- Akisussaafferujussuartut misigaara neriullunga nammassinnaallugu. Pingaartumik uannut Geusip suliai Danmarkip aamma Kalaallit Nunaata siunissaanut pingaaruteqartorujussuartut nalilernikuugakkit.
Silap pissusaanut avatangiisinullu ministeri Martin Lidegaard marlunngornermi nalunaarpoq 55-inik ukiulik professor Minik Rosing Geusip siulittaasuatut januaarip aallaqqaataani atuutilissasoq.
- Geus suliffeqarfiuvoq ingerlalluartorujussuaq qangali inuiaqatigiinnut suliassaminik ingerlatsilluartoq. Neriuppunga taamaaginnassasoq, Minik Rosing oqarpoq.
Rosing ullumikkut Københavnimiittoq Geologisk Museum pisortaaffigaa Humlebækimi Københavnip avannaatungaaniittumi najugaqarluni.
- Danmarkimi Kalaallit Nunaannilumi suliap pingaaruteqarnera ersarissarniassavara. Aamma Geusimi ilisimasat amerlasoorsuit politikkikkut aalajangiisartunut innuttaasunullu ajornannginnerusumik pissarsiarineqarsinnaanera naammassiniarsarissavara.