Atassutip iluani juulli sioqqullugu aningaasarsisarneq assortuussutaasoq
Atassut Nuuk maanna partiip qullersaqarfianik akerliunerminnik saqqummiussipput, taakkua isumaqarput juulli sioqqullugu aningaasarsisitsisarneq qangatut ingerlanneqaannartariaqartoq
- Juulli sioqqullugu aningaasarsisitsisarnerup atorunnaarsinnissaa isumatusaarneruvoq.
Taamak naqissusiivoq Atassut Nuuk, siulittaasumit Steen Lyngemit Sermitsiaq.AG'mut oqaatigineqarluni.
- Misilittakkanit naluneqanngilaq juulli sioqqullugu aningaasarsisitsisarnerup nassataanik ilaqutariippassuit januaarimi qaammammut isumagisassaminnik naammassinninngitsoortartut. Tamassuma nassataanik ilaqutariit tamakku imminnut piffissami sivisuumi ilungersunartorsiortittarput, pissutigalugu akiitsutik qaammatit arlallit akilersorniartaramikkik, Steen Lynge nassuiaavoq, taanna isumaqarpoq innuttaasut tamarmik assigiimmik pisinnaatitaaffeqartariaqartut tamassumalu nassataanik pisortani atorfillit innutaasutuulli allatut aningaasarsinissartik utaqqisariaqaraat.
Atassut Nuuk isumaqarpoq isumatusaarnerussasoq akissarsiat qaammatini allanisuulli tunniunneqartarpat, tassa qaammatip naanerani. Sulisartut aamma sulisitsisut iluminni isumaqatigiissusiorsinnaapput, soorlu ukiup ingerlanerani sipaagassanik ikioqatigiinnikkut. Tamanna inatsisiliorluni aaqqittariaqanngilaq, Steen Lynge.
Ullumi siusinnerusukkut saqqummiunneqarpoq Atassutip nuna tamakkerlugu kattuffianit Naalakkersuisut aalajangiinerat akerlilersorneqartoq, namminersorlutik oqartussanit decembarimi aningaasarsiassat qaammatip naanerani aatsaat tunniunneqassasut.