Timersorneq politikkilu tapersersoqatigiittut
Peqqissutsimut naalakkersuisoqarfik aamma Kalaallit Nunaanni timersortartut kattuffiat suleqatigiinnissamik isumaqatigiissusiorput. Ilaatigut meeqqat inuusuttuaqqallu imigassamik aalakoornartumik hashimillu pujortalinnginnissaat anguniarlugit suleqatigiissallutik
Peqqissutsimut Naalakkersuisoq, Agathe Fontain, aamma Kalaallit Nunaanni Timersoqatigiit Kattuffianni siulittaasup tullia, Finn Meinel, ippassaq isumaqatigiissummik atsiugaqarput, peqqinnissamik siuarsaanermik pinaveersaartitsinermillu suliaqarnerup nukittorsarneqarnissaanik siunertaqartumik.
- Kalaallit Nunaanni Timersoqatigiit Kattuffiata Peqqissutsimullu Naalakkersuisoqarfiup isumaqatigiissuteqarnerat paasisaqariarpoq illua-tungeriit innuttaasut peqqinnerannut iluaqutasussamik peqqinnissamik siuarsaanermik pinaveersaartitsinermillu suliaqarnerup kivinneqarnissaanik kissaateqarnerattut. Kalaallit Nunaanni Timersoqatigiit Kattuffiata ataani inissisimapput peqatigiiffiit arlallit, ilaatigut meeqqanik inuusuttunillu sullitaqartut. Taamaattumik tulluarluinnarpoq ilaatigut suleqatigiissutigissallugu inuusuttunut peqqissumik inooriaaseqarnissaq pillugu paasissutissanik siammarsaaneq, Peqqissutsimut Naalakkersuisoq Agathe Fontain oqarpoq.
Aamma timersortartut kattuffiannit soorunami isumaqatigiissut nutaaq nuannaarutigineqarpoq:
- Nuannaarutissaavoq Naaminersorlutik Oqartussat Peqqissutsimut Naalakkersuisoqarfik aqqutigalugu Kalaallit Nunaanni Timersoqatigiit Kattuffiat suleqatigerusummassuk peqqinnanngitsunik nerisaqarnerup annikillisarnissaa, atornerluinernik akiuiniarneq inooriaatsimillu tunngavilimmik nappaateqalertarnerit pinaveersaartinniarlugit suliaqarnerit pillugit. Kalaallit Nunaanni Timersoqatigiit Kattuffiannit Namminersorlutik Oqartussat iliuusissanik pilersaarusiornissaq pillugu suleqatitut pingaarutilittut isigaavut neriuppugullu isumaqatigissuteqarnerput qanittumik pitsaasumillu suleqatigiinnissamik periarfissiiumaartoq, tamanna iluaqutigalugu tamatta peqqinnerulernissatsinnik kinguneqartussamik, Kalaallit Nunaanni Timersoqatigiit Kattuffianni siulittaasup tullia, Finn Meinel oqarpoq.
Peqqissutsimut Naalakkersuisoqarfimmit aammalu Kalaallit Nunaanni Timersoqatigiit Kattuffiannit ilaatigut makku suleqatigiissutigineqassapput:
- Aanngajaarniutit, pujortartarneq nerisaqarnerlu pillugit politikkissanik suliaqarneq, timersoqatigiiffinnit tamanit atorneqarsinnaasunik
- Meeqqat inuusuttullu akornanni imigassamik ikiaroornartumillu atuinermik pinaveersaartitsineq
- Meeqqat inuusuttullu pujortalinnginnissaat pillugu suliniuteqarneq
- Timip aalatittarnissaa pillugu innersuussutit malinneqarnissaannut innuttaasut periarfissaqarnerunissaat
Taamatut suliaqarnermut atatillugu timersoqatigiiffiit meerartaannut inuusuttortaannullu sammititanik paasisitsiniaanissanik suliaqartoqassaaq, taamatuttaalu anguniarneqassalluni timersornikkut aaqqissuusinerni assiginngitsuni peqqinnartumik inooriaaseqarneq pillugu paasissutissiisoqartarnissaa.