Ikuallannermik eqqugaasunut katersiniartoq

Sapaatip akunnerata siuliani Nuummi sakkortuumik ikuallattoqarnerata kingorna ikiorsiiniarluni Nuummi innuttaasut ilannguat ikuallannermik eqqorneqartunut nammineerluni katersiniartoq

Tallimanngornermi ullaakkut 09.15 miss. Nuummi Qullilerfimmi inissiat ilaat ikuallappoq. Assi: Leiff Josefsen

Nuummi innuttaaqataasup Signe Petersenip sapaatip akunnerata siuliani Nuummi Qullilerfimmi inissiap ikuallarujussuarneranit eqqugaasut ilisarisimanngilai.

Kisianni misiginneqatigingaarpai taamaattumik aalajangersimavoq nammineq katersisitsinermik aallarniiniarluni, inissiani ikuallannermit eqqugaasunik ikiorsiissutissanik.

Katersiniarneq ajunngitsumik ingerlavoq, Signe Petersen Sermitsiaq.AG'mut oqarpoq.

- Ajunngitsumik ingerlavoq. Manna tikillugu poorsuit sisamat atisanik imallit pissarsiaraagut, tamatuma saniatigut nillataartitsivik, fjernsynimut nerrivik aamma taakkununnga naatsorsuuppagut, Signe oqarpoq.

Ikuallannermik eqqukkanut tunniusserusukkuit Signe Petersenip katersinera sisamanngornermi unnukkut 20 killilik tapiiffigisinnaavat.

Tallimanngornermi katersat ikuallannermit eqqugaasunut tunniunneqassapput. Signe Petersen Nuussuarmi Sangoriami najugaqarpoq, saaffigineqarsinnaalluni 292380.

Katersat amerlavallaassappata Signe Petersenip tunniussat ilaat angerlarsimaffeqanngitsunut ingerlateqqissanerarpai.

Powered by Labrador CMS