Juulliaqqami kisimiissanngilatit

Nunaqqatit allat ilagalugit nalliuttorsiualaarnissamut peqataaniarluni nalunaarnissamut ullumi marlunngorneq periarfissaavoq kingulleq. Peqataanerlu akeqanngilaq

Ukioq manna Vejlemit Inuit nunatsinnut inuulluaqqusinerannit. Assiliisoq: Rimdal Th. Høegh Ikinngutigiit - Aalborgimi kalaallit peqatigiiffianni taama ateqartumi erinarsoqatigiit Aalborgimi Hans Egedes Kirkemi juulliaqqami naalagiaqatigiinnermi tussiaqattaassapput. Assiliisoq: Rimdal Th. Høegh

Kalaallit Nunaanneersuuguit Aalborgimilu najugaqarlutit decembarillu 24-ani nunaqqatitit allat ilagerusukkukkit taava Aalborgimi Kofoeds Skolemi juulliararsioqatigiinnissamut peqataaniarlutit ullumi marlunngornermi suli nalunaarsinnaavutit.

Ukioq manna juulliaraq siornatigornit allaanerussaaq. Kalaallimik palasimik amigaateqarneq pissutigalugu Aalbrogimi Grønlands Torvimi Hans Egedes Kirkemi juulliaqqami kalaallisut naalagiaqatigiinneq allanngortiallaqqanneqassaaq. Ukioq manna qallunaamik palaseqarluni naalagiaqatigiittoqassaaq erinarsoqatigiit Ikinngutigiit kalaallisut tussiaqattaassallutik juullillu iivangkiiliua kalaallisut Otto Steenholdtimit atuffassissutigineqassallunoi.

Pilersaarut
Kalaallisut naalagiaqatigiinneq pissaaq nal. 10.00. Naalagiaqatigiinnerup kingorna kalaallit peqatigiiffiat Ikerasak kalaallit illuanni qanittumiittumi Pyramideni kaffillissaaq juullimi pilluaqqusissalluni.

Nalunaaqutaq 14 orpiliaqatigiinneqassaaq Ågade 23-mi Kofoeds Skolemi tunissutinillu agguaasoqassalluni, nal. 18-imiillu nereqatigiinneqassalluni ataatsimuualaaqatigiinnertalimmik.

Nalunaaqutaq marlunut orpiliaqataarusukkuit arfinermullu nereqataarusukkuit Kofoeds Skolemut nalunaassaatit kingusinnerpaamik ullumi marlunngornermi, tassanilu peqataaniarluni nalunaarutit nal. 10-miit nalunaarsorneqalissapput.

Suliffeqarfinnit inuinnarnillu tunissuteqartoqarneratigut orpiliaqatigiinnermut nereqatigiinnermullu peqataaneq akeqassanngillat.

Powered by Labrador CMS