Inuunerissaarnerulissaagut
Ukiup nikinneranik inuiaat peqqissuunerunissaat anguniarlugu suliniut Inuuneritta II aallartissaaq. Kalaallit Nunaanni innuttaasut peqqissuunissaanik suliniut siulleq Inuuneritta nutaamik paarlatseqassaaq
Innuttaasut peqqissuunissaannik suliniut nutartigaq Inuuneritta II 2019-ip tungaanut atuuttussaq ukiup nutaap aallartinnerani atuutilersinneqassaaq. Peqqissutsitsinnut sunniuteqartut pingaarnersaat tassalu imigassaq, hashi, tupa, nerisat timillu atornissaa Inuuneritta II-mi qitiutinneqarput.
- Inuuneritta II-mi sammineqartut sisamaasut innuttaasunut tamanut, pingaartumilli meeqqanut, inuusuttunut ilaqutariinnullu immikkut pisariaqartitsisutut toqqakkanut pingaaruteqarput, Peqqissutsimut Naalakkersuisoq Agathe Fontain, Inuit Ataqatigiit nalunaaruteqarpoq.
Inuunerinnerulissaagut
- Ilaqutariinni imigassamik hashimilllu atornerluiffiusuni peroriartornerup annertuunik kingunerluuteqartarnera, taama qitiutitsinermut patsisaavoq. Innuttaasut ilarpassui meeraanerminni inuusuttuaraanerminnilu tupatulersarput. Ileqqut peqqinnanngitsut taamaattut kingusinnerusukkut nappaateqalernermut, toqujaarpallaarnermut, ukiunillu peqqilluni inuuffissaraluanik annaasaqarnermut patsisaasarmata, timip atornissaa peqqinnartunillu nerisaqarnissaq meeraanermiilli tunngavilerneqartariaqarput.
- Inuuneritta II-mi peqqissuseq pitsaasumik inuuneqarnertut isigineqarpoq innuttaasullu naleqartitamik inuuneqarnerisa patajaallisarneqarnissaa siunertaalluni. Pitsaasumik inuuneqarneq pitsaasumik isumalimmillu inuuneqarumalluni piginnaasanik periarfissanillu tamakkiisumik atuisinnaanermik imaqarpoq. Taamaammat inooriaatsimik patsiseqartunik nappaateqarata piginnaajunnaarnatalu inuusinnaanissamut sunniuteqarnerpaat Inuuneritta II-mi qitiutinneqarput, Peqqissutsimut Naalakkersuisoq Agathe Fontain oqarpoq.
Siulleq nutaarlu assigiinngissuteqarput
Inuuneritta II-p Nunatsinni innuttaasut peqqissuunissaat pillugu suliniummut Inuunerittamut siullermut taartaavoq. Suliniutit taakku marluk immikkoorutaat pingaarneq tassaavoq sammisat anguniagassatullu siunniussat erseqqisarneqarlutillu ikilisaavigineqangaatsiarnerat, taamatuttaaq suliniutinik ataqatigiissaarinerup patajaallisarnissaa pingaartinneqarpoq.
Inuuneritta II-mut atatillugu innuttaasut peqqissuunissaat pillugu iliuusissanut akisussaassusiliisumik isumaqatigiissusiortoqarpoq. Innuttaasut peqqissuunissaat pillugu Naalakkersuisut Qeqqata Kommunia, Kommuneqarfik Sermersooq Qaasuitsullu Kommunia qanittukkut politikkikkut isumaqatigiissusiorput. Naalakkersuisut Kommune Kujallerlu qanittumi isumaqatigiissusiulersaarput.
Ukiup nutaap aallartinnerani Inuuneritta II naqitanngorlugu saqqummersinneqassaaq, tigusisussanut arlalippassuarnut nassiussuunneqartussaq, tigusisussanut ilaallutik kommunit, ilinniarfiit peqqinnissaqarfiillu, Agathe Fontain nalunaarpoq.
Inuuneritta II sunik imaqarnersoq annerusumik paasisassarfiusinnaavoq nittartagaq peqqik.gl iserfigalugu. Suliniut 2019-ip tungaanut ingerlasussatut pilersaarutaavoq.