Ove Karl: Suliffissaaleqisut ikileriarput
Nunatsinni suliffissaaleqineq pillugu kiisami nutaarsiassaq pitsaasoq. Novembarimi suliffissaaleqisut siorna novembarimi suliffissaaleqisunit ikinnerupput
Novembarimi illoqarfinni suliffissaaleqisut 2011-mi novembarimi suliffissaaleqisunut sanilliullugit 358-inik ikileriarput. 2011-mi novembarimi suliffissaaleqisut 4126-usimapput, 2012-imilu novembarimi 3768-iullutik.
- Taamaasilluni suliffissaaleqisut ikiliartulerput.
Taamatut oqarpoq inuussutissarsiornermut aatsitassanullu Naalakkersuisoq Ove Karl Berthelsen, Inuit Ataqatigiit.
- Suliffissaaleqisut ikileriarnerannut pissutaavoq suliffissaaleqisunut immikkut ittumik iliuuseqarsimaneq, kommunit namminersorlutillu oqartussat peqatigiillutik aallartissimasaat. Suliffissaaleqinerup akiorniarnerata ilaatut Piareersarfimmi, suliffissarsiuussisarfinni sammisaqarfittullu ilinniagaqarfinni suliniut annertooq aggustimi aallartinneqarpoq. Ataatsimut isigalugu naatsorsuutigineqarpoq 2012-ip naannginnerani inuit 1440-t sulisinneqalersimassasut najoqqutassiuinikkut, piginnaanngorsaanikkut, pikkorissartitsinertigut imaluunniit ilinniagaqartitsinikkut.
Immikkut ittumik suliniuteqarneq
- Suliffissaaleqisunut iliuutsip ilarujussua tassaavoq suliffeqarfiup inissaqartitsisup eqqunniarnera, tassani piginnaanngorsaaqqinneq ikiorsiullugu suliffissaaleqisut atorfimmi suliaqarsinnaanissamut sungiusarnissamik ilinniartitaaqqinnissamillu pisariaqartitsisut ilanngussorneqarlutik. Suliffissaaleqisunut sammisanik pikkorissartitsinerit ingammik inuussutissarsiorfinnut siuarsakkanut nutaanut, soorlu aatsitassarsiorfiusumut takornariaqarfiusumullu tunngatinneqarput, Ove Karl Berthelsen itisiliivoq, ilanngullugulu oqaatigalugu inuusuttunut, meeqqat atuarfiata kingornatigut ilinniagaqarnermik aallartitaqarsimanngitsunut tunngatitanik pilersitsiniarnerit nutaatut aallartinneqarsimasut.
Ove Karl: Ilorraap tungaanut aallarpugut
- Suliffissaaleqisunut immikkut ittumik iliuuseqarnerup inuussutissarsiorfiusup suliffinnik piujuartunik siunissamullu isumannaakkanik suliffissaqarfigisaasa iluini suliffissaaleqisut qinnuteqarnissamut piumassuseqartilerlugillu periarfississavai. Aqqut eqqortoq atugarilerlutigu maannakkut ineriartornerup ingerlasup takussutissiivigaatigut. Suliffissaaleqisut allannguinissamut piareersimassutsimik eqaassuseqarnermillu takutitsiuassappata suliffissaaleqinermi ilorraap tungaanut ineriartornermik attassiinnarsinnaanerput qularutiginngilara, Ove Karl Berthelsen oqarpoq.
Illit isumaqarpit suliffissaaleqisut ikiliartulersut?