Qaqortumi juullimut takutitsineq tupaallannartortalik
Sapaassuit pingajuanni Qaqortup Timersortarfiani juullimut takutitsisoqarpoq Kommune Kujallermit aaqqissuunneqartumik. Pisut pingaarnersaat: Ukiumi timersullammannik angummik arnamllu toqqaaneq
Sapaassuit pingajuanni nuannisartoqarluarpoq Kommune Kujalliup Qaqortumi immikkoortoqarfia Qaqortup Timersortarfiani juullimut takutitsimmat.
Fritidsinspektør Lars Lundblad tikilluaqqusivoq, Reno Band juullisiutinik atuipput, Kommune Kujalliup borgmesteria Simon Simonsen oqalugiarpoq, angutit erinarsoqatigiit Saqqaarik juullisiutinik atuipupt kiisalu Erinnap Nipaa aliikkusersuipput lucia-rtoqarlunilu.
Tamatuma saniatigut aappartiit Susanne aamma Martin Thomsen Davidsen juullisiutinik atuipput, ukioq manna nunatsinni pissartanngorsimasut diplom-innatsinneqarput, kalattoortoqarpoq, illoqarfimmi angutini arnanilu timersullammannik toqqaasoqarpoq kiisalu naggataatigut ataatsimut tussiaqatigiittoqarluni.
Ukiumi timersullammaat angut arnarlu
Pisarnertut pisoq pingaarneq tassaavoq angummik arnamillu ukiumi timersullammammik toqqaarit.
Arnani timersullammattut toqqarneqarpoe 39-nik ukiulik Hanne Johansen, Paamiuni qaannamik pissartanngorniunnermi ukioqatimini nunatsinni pissartanngortoq. Taassuma ukiorpassuarni qajartorneq qitornani ilagalugit aallussimavaa.
Angutini timersullammattut toqqarneqarpoq 50-nik ukiulik Christian Isaksen, taekwondo-mi europami pissartanngortoq. Taassuma Taekwondo ukiorpassuarni aallussimavaa.
Tupaallannermik qullipippoq
Ulloq taanna tupaallannartut ilagaat innuttaasut, tassa Hans Knudsenip ikinngutaasalu Gedion Schmidt, Qaqortumi saniatigooralugu nipilersortartutut ilisimaneqartoq, guitarimik tunimmassuk.
Gedion Schmit Hans Knudsenimut oqarsimavoq guitarini tunisimallugu taamaattumillu sungiusarsinnaajunnaarlunilu aliikkusersuisinnaajunnaarluni. Taavalu ikinngutigiit aningaasanik katersipput Gedion-imut guitarisissutissaminnik. Gedion tupaallannermik qullipippoq.