Kommune innaallagiartortunik biileqalerusuttoq
Pisortaqarfinni namminersorlutillu suliffeqarfinni biilit pigineqareersut biilinik innaallagiatortunik Kommuneqarfik Sermersuumit taarseriartuaarneqarusupput
Kommuneqarfik Sermersooq nammineq ukiuni aggersuni biilinik innaallagiatortunik marlunnik atuilerniarpoq, soorlu aamma ataatsimut orsiisarfiusinnaasunik pilersitsisoqarnissaanik sulissuteqarniartoq. Tamanna kommunip nittartagaani atuarneqarsinnaavoq Kommuneqarfik Sermersooq aamma CSR Greenland biilit innaallagiartortut pillugit suleqatigiinnissamik isumaqatigiissuteqarsimammata.
Pisortaqarfinni namminersorlutillu suliffeqarfinni biilit pigineqareersut biilinut innaallagiatortunik taarseriartuaarneqarnissaat suleqatigiissutigineqassaaq. Namminersorlutik inuussutissarsiuteqartut, Namminersorlutik Oqartussat Nukissiorfiillu akornanni suleqatigiinnermut Kommuneqarfik ataqatigiissaarisuullunilu katersuuffittut inissisimasuujumavoq, tamanna kommunip nittartagaani atuarneqarsinnaavoq.
Tamatuma saniatigut avatangiisinut ajoqutaanngitsunik biilinik atuisarnerup akitsuuteqartinneqannginnera sivitsorneqarnissaa pillugu kommuneqarfik Naalakkersuisunut saaffiginnissuteqassaaq.
Inuussutissarsiuteqartunit pisussaaffiliisumik suleqatigiinnissaq kissaatigineqarpoq, namminersorlutik suliffeqarfiutillillu arlaqartut soorlu ISS, Grønlandsbanken, Taxagut, Deres Auto aamma Nukissiorfiit biilinik innaallagiatortunik pisereersimapput.
Ukiut arlaqanngitsut ingerlaneranni namminersorlutik suliffiuteqartut aammalu Kommuneqarfik Sermersooq biilinik innaallagiatortunik misileraareerput.
Suleqatigiilernermi CO2-mik aniatitsinermik annertuumik Kommuneqarfik Sermersooq annikillisaassaaq Nuummilu illoqarfiup avatangiisaanut annertuumik pitsanngorsaassalluni.