Socialdemokratit ajornerusumik atugassaqartitsineq akiorpaat

Kalaallit Nunaat sapaatip-akunnerani matumani Inatsisartut sivisuumik oqallittoqareersorlu suliniutinut angisuumik inatsimmik akuersissutiginniffigisaat Danmarkimi politikerinit tusagassiuutinillu immikkut sammineqarpoq. Inatsit aqqutigalugu suliffeqarfiit nunanit allaneersut suliniutinut angisuunut atatillugu sulisartunik nunanit allaneersunik nunani allani sulinermi atugassarititaasut naapertorlugit atorfinitsitsinissamut periarfissinneqarput, taama Socialdemokraten.dk ullumi allappoq.

Socialdemokratit apeqqummut isumaat erseqqippoq:
Kalaallit Nunaanni suliffeqarnermut tunngasuni akisussaaffik Kalaallit Nunaata oqartussaaffigilersimavaa, tamannalu qallunaat politikerit akuliuffigisinnaanagulu akuliuffigisussaanngilaat, nittartagaq allappoq.

- Socialdemokratit akisussaaffeqarfigisatsinni tassalu Danmarkimi ajornerusumik atugassaqartitsineq akiorniarpaat. Matumani inatsit tamat oqartussaaqataanerat tunngavigilluinnarlugu Inatsisartuni akuersissutigineqartoq pineqarpoq. Pissutsillu immikkuullarissut pineqarput, Kalaallit Nunaat suliniutinut angisuunut atatillugu naammattunik sulisussaqanngimmat. Inatsit allanngortinneqassappat Kalaallit Nunaanni innuttaasut allanngortitsisussaapput, Danmarkimi Folketingimi politikeriunngitsut, socialdemokraten.dk allappoq.

Folketingi tunngaviatigut akornusiisinnaavoq
- Kalaallit Nunaat namminerisamik nunanit allaneersunut politikkeqalerniarluni suli aalajangersimanngilaq. Taamaattumik assersuutigalugu Kinamiut sulisartut suliniutini angisuuni sulisinnaalersinnagit Folketingimi inatsimmik akuersissutiginnittoqartariaqarpoq. Tassa Folketingi tunngaviatigut akornusiisinnaavoq. Matumanili akerleriissut nunanit allaneersunut politikkimut tunngassuteqarani Kalaallit Nunaanni sulinermi atugassarititaasunut tunngassuteqarpoq. Tamatumani kalaallit aalajangiisussaapput. Taamaattumik Kalaallit Nunaata aalajangernera ataqqissavarput, Socialdemokratit isumaqarput.

Nunani tamalaani inatsisit isumaqatigiissutillu malinneqassapput
Kalaallit Nunaata nunat tamalaat akornanni pisussaaffiisa suliniutini angisuuni malinneqarnissaat suliniutinut angisuunut inatsimmi allanneqarsimavoq. Tamanna pingaaruteqarpoq, tassami inatsisit nunat tamalaat akornanni malittarisassanut isumaqatigiissutinullu attuumassutilinnut naapertuuttuunissaat namminersorlutik oqartussat akisussaaffigaat. Inatsisit apeqqutinik tunngaviulluinnartunik naqisimaneqarnerani peqatigiiffinnut ilaasortaasinnaanermut sulisullu pisinnaatitaaffiinut tunngasunik ataqqinnittuunissaat Kalaallit Nunaata akisussaaffigisariaqarpaa.

Kinamiut Kalaallit Nunaannissinnaanermut akuerissuteqartut Danmarkimiissinnaanermut akuersissuteqarfigineqarnavianngillat, Socialdemokraten.dk ilisimatitsivoq.

LO qanoq isumaqarnersoq Sermitsiami sapaatip-akunnerani saqqummersumi aamma atuaruk. Aviisi suliniutinut angisuunut inatsimmut tapersersuisunik akerliusunillu arlalissuarnik allaaserisaqarpoq. Aviisi maani pisiarisinnaavat paasisaqarnerullutillu kiisalu oqallinnermut malinnaallutit: