Danmarkip nunattalu aatsitassat qaqutigoortut suleqatigiissutigissavaat
Danmark Kalaallit Nunaallu suleqatigiillutik aatsitassat qaqutigoortut qallorneqarnissaannut aqqutissiuussisariaqarput, Venstremeersoq Kim Andersen isumaqarpoq
Danmark Kalaallit Nunaallu Kalaallit Nunaanni aatsitassarsiornikkut suliffissuaqalersinnaaneq pillugu suleqatigiinnerusariaqarput. Aatsitassanut qaqutigoortunut atatillugu ajornartorsiummut atatillugu Danmarkimi naalakkersuisut eqqummaarinnerusariaqarput. Taamaattumik Venstremit inuussutissarsiornermut siuariartortitsinermullu ministeri Annette Vilhelmsen, SF, januaarimi isumasioqatiginiarneqarpoq. Taama Folketingimi inuussutissarsiornermut ataatsimiititaliamut ilaasortaq Kim Andersen Sermitsiaq.AG-mut oqarpoq.
- Aatsitassat qaqutigoortut Kalaallit Nunaanni nassaassaasut eqqarsaatigalugit ajornartorsiummut Danmark isiginninniartariaqarpoq. Danmarkip Kalaallit Nunaatalu peqatigiillutik aatsitassanik piumaneqarluartunik tamakkuninnga qalluisinnaanissaq qulaajaavigisariaqarpaat, Kim Andersen Kalaallit Nunaanni Aatsitassat pillugit Siunnersuisoqatigiinnut siulittaasuusimasoq oqarpoq.
- Norge, Sverige, Tyskland Tuluit Nunaallu immaqa aamma sassartinneqarsinnaapput Danmarkimilu aningaasaliisartut eqeersimaarnerusariaqarput, Kim Andersen oqarpoq.
Kina Kalaallit Nunaanni, nunarsuarmi Danmarkimullu atatillugu aatsitassanut aatsitassanullu qaqutigoortunut kisermaassisunngussagaluarpat pilersuinissamut isumannaassuseq pillugu Danmarkimi naalakkersuisut killiffimmik isiginninnerannik Folketingimut ilaasortap tusarniarusuppai apeqqutinillu sisamani inuussutissarsiornermut siuariartortitsinermullu ministerimut nassiussisimalluni.