2012 naggaserlugu qulinik isertitsisoq
Mia Egede Rasmussen 2. divisionimi Silkeborg Voelimeersoq Haderslevimut unamminermi isertitsisaqattaarluarpoq
Juullingajalerpoq, kalaallillu assammik arsartartut arlallit nunatsinnut angerlarlutik juullisioriassapput. Ilaat qasujaassusertik attatiinnarumallugu Brugsens Julecupimut peqataassapput, allallu juullisioriartussalluti.
Brugsens julecup pillugu maani atuarit
Mia Egede Rasmussenili Qaanaamut juullisioriartorlunilu ukiortaarsioriartussaaq, ataataa Frank Rasmussen taavani sulimmat.
Sulili avannamut aallartinnani Silkeborg Voelip 2. divisionimi unammisartuisa Haderslevimut unamminerannut peqataavoq. Unammineq naligigiinnarfiulluni 23-23-mik inerneqarpoq, Mia Egede Rasmussenilu quleriarluni isertitsivoq.
- Unammineq kusanarpallaanngilaq kukkunivut amerlavallaarmata. Periarfissarpassuit atornerluppavut, piffissallu ingerlanerani isertitanik arfinilinnik kinguaqqalluta. Unamminerup naanngilaattaani straffemik isertitseriarnermi 23-23-mik naligiilersitsivunga, Mia Egede Rasmussen oqarpoq.
Mia Egede Rasmussenip saniatigut nunatsinneersoq Kathrine Mikkelsen peqataavoq. Kathrine Mikkelsen marloriarluni isertitsivoq, sisamariarluni isertitsinissamut tunniussaqarluni - assistimik taaneqartartunik.