Oqallisissiaq: Aningaasat naapertuilluarnerusumik atorneqartariaqarput

Anguniagassaq: Nunatta aningaasaqarnera atorluaanikkut pitsanngorsarlugu.

Maannakkutut akitsuutinik pilersitsinikkut qaffaanikkulluunniit pitsanngorsarneqartarpoq. Pitsanngorsaaniaraanni nutaamik eqqarsarneq atorlugu aningaasat pitssaanerusumik atornissaat anguniarneqarsinnaavoq.

Naluneqanngitsutut nunatta aningaasaqarniarnera aalaakkaasumik inissisimakannerpoq. Aningaasallu kaaviijaartinneqartut pitsaanerusumik atorneqarsinnaapput.

Inuiaqatigiit aningaasaataannik pitsaanerusumik atuiffissatut taaneqarsinnaasut ilagaat pisortani suliffillit najugarisaat. Nunarput sulisut inissaqarnissaannut aammalu utaqqiisaagallartumik inissaqarnissaannut aningaasanik amerlasuunik atuisarpoq.

Sulisut inissaqartinneqartartut allanut sanilliullugit isertitamikkut aammalu suliffissaqarnermikkut patajaattumik inissisimasarput.

Sulisut inissaqarnissaat siunissami aamma pisariaqassaaq, kisiat tamanna killilersimaartariaqarparput, amillassusaasa aammalu ineqartitaanissamut piffissarititaq killilerneqartariaqarmata. Taamaalilluni sulisut nutaat ineqarnissaat periarfissaassaaq, kisiannili ineqartoq piumaffigalugu nammineq inissaqarnissaq siunissami akisussaaffigilerumaarmagu pisinissaminut imaluunniit attartornissaminut piareersarnissaa sillimaffigeqqullugu.

Taamaaliornikkut suliffik aqqutigalugu ineqartarneq annikilliartortinneqarsinnaavoq,

Sulisummi taakku nunaqqatimittut allatut akisussaaffigisariaqarpaat nammineq ineqarnissaq.

Taamaliortoqarnikkut ataani taaneqartut anguneqarsinnaapput:

- sulisunut inissiat ikilinerisigut inissiat nalinginnaasumik utaqqisunut inissaqartitsineq pitsanngussagaluarpoq,

- qitiusumik atorfillit allatuulli namminneq inissartik pisiarisalissagaluarpaat suliffinnillu pilersitseqataalerlutik,

- inuit inissamik pissarsisinnaanissaminnut periafissaat assigiisilersinneqassagaluarput,

- aningaasat inissialiornermut atorfillit kisimik inissarisaannut atorneqartartut ikilisinneqassagaluarput (sipaarneqassagaluarput),

- aningaasat utaqqiisaagallartumik ineqartitsinermut (vakant-bolig) atorneqartartut ikilisinneqassagaluarput (sipaarneqassagaluarput)

Taamatut nutaamik aaqqiinikkut aningaasat nunatsinni kaaviijaartinneqartut pitsaanerusumik atorneqarsinnaanngussagaluarput.

Akileraarutinik qaffaaginnarata illuuteqarnermilu atukkat erniaat ilanngaataasarnerat peernagu, piffissanngorpoq inuiaqatigiit aningaasaataasa iluamik atornissaannik nutaamik nalilersueqqinnissatsinnut. Inuiaqatigiit aningaasaataat pitsaanerusumik nalingiinnerusumillu inuiaqatigiit akornanni aggornissaat piffissanngorpoq.

Naalakkersuisutta aningaasaqarniarneq immaqa ullumikkut amigartooruteqarani ingerlanniagaat avataaniit kusanarpasikkaluarluni, siunissami kingunissaat imminik illersorneqarsinnaanngilaq. Amigartoortannginneq akileraarutinik qaffaanikkut ammalu erniat ilanngaataasarunnaanissaannik ilaatigut anguneqartarpoq, tamannali siunissaq isigalugu imminut akilersinnaanngilaq aammalu nunatsinnut akisunerulissalluni taamatut ingerlanneqaannassaguni.

Erniat ilanngaataasarnerat milleneqarpat peerneqarlunilu, nunatsinnut tamanna akisoorujussuussaaq. Inuit nammineq inigisartik akissaqartikkunnaassaavaat, taamaattumik pisortat inissialiortarnerat qaffanneqartariaqalisssammat. Nunatsinnut akisuunerulerluni.

Piffissanngorpoq nunatta aningaasaqarnera iluamik aammalu inuiaqatigiinnut nalingiinnerusumik agguarneqarnissaat anguniarneqartariaqalerpoq. Inuiaqatigiit assigiimmik naligiimmillu inuiaqatigiit aningaasaataannik periarfissinneqarnissaat piffissanngorpoq.