Kuupik juullip inuanut ikiortitut
Sisamanngormat Seoulimi suliffeqarfinnut pulaartarluni Koreallu Kujalliup prædisentianik ataatsimmeqateqarluni pisussarpassuit ilaanni meeqqat meeqqerivimmiittut 24-it naapilaarnissaannut inissaqarpoq
Nunatsinni juullertarnera Koreami Kujallermi juullertarneraniit allaaneroqaaq. Decembarip 24-at ilaqutariinnut atorneqartorsuuneq ajorpoq orpiliarluni tunissutissarpassuaqarlunilu. Ulluni makkunani Korea Kujallermi Seoulimi sumi tamaani qullilersortoqarsimavoq, orpiliaqarluni, juullimut pinnersaateqarluni nipilersortoqarlunilu, juullilli anersaava annikitsuinnarmik atorneqarpoq immaqalu atugaanerulernaviarani.
Seoulimili meeqqat meeqqerivimmiittut 24-it immaqa juullimut naasussamik ikkussivigineqarput siunissami annertusisinnaasumik. Pisussarpassuimmi aaakornanni kalaallit aallartitat ulluni makkunani Seoulimi inuussutissarsiornikkut attavissaminnik noqqaarneranni allatut ittumik ussassaarilaarnissamut inissaqarpoq.
Læs "Grønland og Sydkorea vil tættere på hinanden"
Læs "Officielt besøg indledt i Sydkorea"
Sisamanngornermi ullup qeqqani Kuupik Kleistip Korea Kujalliup præsidentiatanut Lee Myung-Bakimut inigisaanut The Blue Housemut pulaarpaa, illorsuup naalaffissuarmut eqqaanartup tungujortumik qaliaqarnera pillugu taaguutaalersimalluni, kingornalu Seoulimi illoqarfiup immikkoortuani Gangnamimik taaguuteqartumi niuertarfissuarmut Shinsegaemut pulaarnermi juullip inuanut ikiortaalluni.
Tassani nipitoqisumik tikilluaqquneqarpoq: Meeqqat 24-t Merry Christmasimik suaarlutik, marlukkutaarlutik tunuleriiaarlutik Kuupik Kleist tikilluaqqugamikku, jullillu inua peqatigalugu meeqqat tamaasa juullip inuata nunaaniit tunissuteqarfigalugit, arsamik puisit amiinik sanaajusumik Nuuk Couturemit mersorneqartumik.
Ataqqinninniarlutik sikisaarlutik qujapput: Thank you kingorna illuikkiamut eqqaanartumi paarngorsinnaallutik Kuupik Kleistilu assiliseqatigalugu.