Nunatsinneersumik mamartortugassaqarput
- Delicious (mamarmata) , Koreamiut tuluttut oqallullutik oqamisarput Royal Greenland tallimanngormat ullaap tungaani Seoulimi akunnittarfimmi Shillami inuussutissarsiorneq pillugu isumasioqatigiinnerup kingorna kalaallit nerisassaataannik immiaaqqanillu sassaalliimmat
Korea Kujallermi inuussutissarsiornermik suliaqartut 200-nit amerlanerusut kalaallit nerisassaataannik pitsaalluartunik mamarsarput. Tamanna pivoq inuussutissarsiornikkut isumasioqatigiittoqareersorlu tallimanngormat ullaap tungaani kalaallit aningaasaqarnikkut attavissaminnik pissarsiniarlutik suliniuteqarmata takornariaqarneq, aatsitassat, imeq, nerisassat atisaliallu eqqarsaatigalugit.
Tamakkuninnga suliaqartunit tamanit saqqummiisoqarpoq. Takornariaqarneq nerisassiassallu inersuarmi immikkoorlutik, aatsitassarsiornermut tunngasut inimi allami Korea Kujallermi illoqarfissuarmi Seoulimi akunnittarfimmi Shillami saqqummiunneqarlutik.
Isumasioqatigiinnerit marluk naalakkersuisut siulittaasuanit Naalakkersuisut Kuupik Kleistimit ammarneqarput, ilaatigullu nerisassaativut ussassaarutigalugit:
- Kalaallit Nunaata ernga nunarsiarmi tamarmi minguinnersaavoq, tamannalu aalisagaqassutsimut pitsaalluartuuvoq. Ilaatigut Københavnimi neriniartarfimmut Nomamut pilersuisuuvugut, taannalu marloriarluni nunarsuarmi neriniartarfiit pitsaanersaattut nalilerneqarsimavoq. Aammali puisi atortarparput itsarli atorluarsimallutigu. Amia qaanniarisarparput atisaliaralugulu, ullumikkut amia atisalianut nutaalianut atortarparput. Amiali taamaallaat atorneq ajorparput, neqaali nerisarlutigu. Præsidentersi Lee aperiinnariarsiuk. Puisip neqaa ussersimavaa septembarimi nunatsinniikkami, Kuupik Kleist oqarpoq neriuutigalugulu isumasioqatigiinnermi attaveqatissanik pilersiortortoqassasoq.
Læs "Kuupik som julemandens hjælper"
Læs "Grønland og Sydkorea vil tættere på hinanden"
Læs "Officielt besøg indledt i Sydkorea"
Kalaallit nerisassaataat peqqaannagit
Kingorna kalaallit nerisassiaannit sassaalliisoqarpoq Hotel Arctic igasumit Jeppe Ejvind Nielsenimit suliarineqartunik. Nerisassiassat Royal Greenlandimeersuupput, qalerallit, assagiarsuit, kinguppaat ooqanngitsut, nunatsinneersumik immiaaraqarluni Nive Nielsen and the Deer Children nipilersorlutik.
Sassaalliutigineqarput cannelloni assiarsulikkat quajaatilerlugit imusat. Qaleralik forårsløgilerlugu soyami seernartuligaq, rischipsilik sesamilerlugulu. Kinguppaat ooqanngitsut agurkilerlugit. Qaleralik pujuugaq foie gras-lerlugu (nerlerni tinguliaq) tomat salsalerlugu.