- Thorning allanik periarfissaqanngilaq
Kalaallit Nunaanni aatsitassarsiornerup akornusernissaa Danmarkimi ministeriunerup akerlilerpaa. Kisianni aamma allatut iliuuseqarsinnaanngilaq, naliliisartoq oqarpoq - sooq taama oqarnersoq atuaruk
Danmarkip ministeriunera Helle Thorning-Schmidt, Socialdemokraterne, marlunngornermi sapaatip-akunneranoortumik tusagassiortunik katersortitsinermini oqarpoq, Kalaallit Nunaanni suliniutinut angisuunut pilersinneqarsinnaasunut atatillugu aatsitasanut kiisalu aningaasarsianut sulinermilu atugassarititaasunut tunngasut Danmarkip oqaasissaqarfiginngikkai.
- Illersuiniarpalaartumik nipeqarneq unitsittariaqarparput. Aatsitassat, aningaasarsiat sulinermilu atugassarititaasut Kalaallit Nunaata nammineerluni aalajangigassarai. Kalaallit Nunaani qanoq iliortoqanissaa uanga politikerilluunniit qallunaat allat aalajangigassarinngilaat, Helle Thorning-Schmidt ilaatigut oqarpoq.
Læs "Doris: De vil ikke forstå, at kolonitiden er forbi"
- Allamillu iliuuseqarsinnaanngilaq, politikkikkut naliliisartoq Peter Lautrup TV2-mut oqarpoq nangillunilu:
Thorningimut ilorrisimaarnartoq
- Tunngaviatigummi ilumoorluinnarpoq. Danmarkip piviusorsiortumik isiginnittaaseqarluni Kalaallit Nunaat aatsitassanut suliffeqarnermullu tunngasuni aalajangiisinnaassuseqalersissimavaa. Kisianni tunngavimmik tamatuminnga najoqqutaqarneq inuttaanut aamma ilorrisimaarnartuuvoq, oqaluuserisaq nuanniitsuummat, oqarpoq.
Oqaluuserisarlu nuanniitsoq ilaatigut Kalaallit Nunaata pissusilersorneranik qallunaarpassuit Peter Lautrup naapertorlugu paasinnissimannginnerannut tunngassuteqarpoq:
Læs "DF vil stoppe social dumping i Grønland"
Qallunaat paasinninngillat
- Kalaallit uatsinnut qalllunaanut ukiut ingerlaneranni ataatsimoortumik tapiissutitigut milliarderpassuarnik tunniussaqarsimasunut taarsiullugu aatsitassaatiminnik Kinamiunut tunisilernerat qallunaarpassuarnit paasiuminaatsinneqarnera malunnarpoq. Oqallinnerlu tamanna ministeriunerup iserfigerusunngilaa, pingaartumik qanoq iliuuseqarfigisinnaanngikkaa aamma eqqorluinnartuummat, Peter Lautrup tv2.dk-mut oqarpoq.
Læs "Stort fagforbund: Ekstremt skamfuldt"
Suliniutinut angisuunut inatsisip Danmarkimi sulisartut kattuffiinit aamma sooq oqaluuserineqartorujussuanngornera eqqoriarpaa:
- Danmarkimi sulisartut kattuffiinut mianernartuuvoq. Tunngavigisaq pissutigalugu kisianni aamma ajornartorsiutinik pilersitsimmat: Qallunaaq ilinniagaqarsimanngitsoq Kinamiunik akissarsiakitsuararsuarnik unammillerteqassaguni Kalaallit Nunaannut suliartorsinnaajunnaarpoq. Aamma Kinamiut Kalaallit Nunaanniit Danmarkiliarsinnaanerat qanoq ililluni pinngitsoortinneqarsinnaanersoq apeqqutaavoq, Lautrup naliliivoq.