- Niviarsiaqqamik inissiisarfimmiittoqarnera isornarluinnarpoq
Niviarsiaqqamik 15-inik ukiulimmik piffissami matumani inersimasut pinerluuteqarsimasut akornanni Nuummi inissiisarfimmiittumik suliami Atassummeersup Steen Lyngep Naalakkersuisut aamma Kommune Kujalleq avoqqaarai
Niviarsiaqqap 15-inik ukiullip Nuummi pinerluuteqarsimasut akornanni inissiisarfimmiitinneqarnera KNR-imi radioaviisimit saqqummiunneqareersorlu uissuummisoqarpoq. Ulloq unnuarlu angerlarsimaffimmut inissinneqarsinnaasimanngimanngooq.
Pisoq alianartoq tamanna Atassummeersup Steen Lyngep isornartorsiorpaa.
Læs "15-årig pige smidt i anstalt"
- Meeraq 15-inik ukiulik inissiisarfimmut inersimasunut naatsorsuussaasumut inissinneqarmat Kalaallit Nunaanni oqartussat meeqqap pisinnaatitaaffiinik unioqqutitsipput, Steen Lynge Sermitsiaq.AG-mut oqarpoq.
- Meeraq inersimasunut imminut illersorsinnaanngilaq, taamaattumik sumiiffimmi taama ittumi tigummigallagaassanngilaq imaluunniit pineqaatissinneqarnerminik atuisinneqassanani. Meeraq pinerluttulerinermik inatsimmik unioqqutitsisimagaluarpalluunniit illersorneqartussaavoq.
- Kommunip (Kommune Kujalleq, aaqq.) aaqqiissutissamik nassaarsimannginnera isornarluinnartuuvoq. Kisianni Naalakkersuisunu ilaasortat suliamut akuliussimannginnerat suliamilu iliuuseqartoqarneranik paasiniaasimannginnerat minnerpaamik taamatulli isornartigaaq. Tamatumani inatsisinut isumaginninnermullu naalakkersuisut akuliussimasariaqaraluarput suliarlu malittarisariaqarsimagaluarlugu, Steen Lynge oqarpoq.
Lynge: Naalakkersuisut akisussaaffimmik sumiginnaapput
Niviarsiaraq 15-inik ukiulik tillinniarsimasutut ataasiarlunilu nakuusersimasutut pasineqartoq KNR naapertorlugu Nuummi inissiisarfimmi sakkortuumik pinerluuteqarsimasut akornanniippoq. Sisimiuni angerlarsimaffimmi najugaqarsimagaluarpoq Kujataaneersuullunili.
- Kommuni pisussaaffimminik naammassinninngippat Naalakkersuisut akuliuttussaapput kommunimilu akisussaaffimmik avaqqutaarineq aaqqiiviginiarlugu qanoq iliuuseqartoqarnera misissortussaallugu siunissamilu assingusumik pisoqaqqinnginnissaa isumagalugu. Taama pisoqarsimagunanngilaq. Kommuni meeqqamik sumiginnaavoq, aamma Naalakkersuisut sumiginnaasut oqartariaqarpoq, Lynge tunngavilersuivoq.
- Inuiaqatigiit innuutaasunik tamanik aamma inunnik pinerluttulerinermi inatsimmik unioqqutitsisimasunik illersuisinnaanngitsut inuiaqatigiittut inuit inatsisitigut illersugaanerannik pingaartitsisutut taaneqarsinnaanngillat.
Piaarnerpaamik aaqqiisoqartariaqarpoq
- Taamaattumik Naalakkersuisut kaammattorneqassapput suliamut akuliuteqqullugit aaqqiissutissamillu piaarnerpaamik nassaartoqarnissaanik piumasaqaqqullugit. Aaqqiissutissaq allaanersoq apeqqutaanngilaq. Meeqqamut pitsaanerusussaq tamatumani illersorneqartussaavoq, Steen Lynge oqarpoq.
15-inik ukiulik decembarip pingajuanili inissiisarfimmut inissinneqarsimavoq. Eqqartuussivik novembarip 28-ani aalajangerpoq naleqquttumut inissinneqassasoq.
Sermitsiaq.AG Naalakkersuisunit Kommune Kujallermillu oqaaseqartitsiniarpoq.