Doris: Nunasiaataajunnaartugut paasiumanngilaat
Siumut sinnerlugu Folketingimut ilaasortap ministeriuneq nersualaarpaa qallunaat suliniutinut angisuunut inatsitsimmut akuliunniarnerannik tunuartitsimmat. Illuatungaagut Folketingimi partiit saamerliunerit talerpilliunerillu appisaluullugit
Soorlu naluneqanngitsutut Siumut partiinit kisiartaalluni suliniutinut angisuunut inatsimmik taaseqataanngilaq, inatsit oqallisaaqisoq sapaatip akunnerata siuliani akuerineqarmat. Partiimiilli amerlanerussuteqartut aalajangiussaat tapersersorneqarpoq aamma qallunaat politikerii taamaattariaqaraluarput, Siumut sinnerlugu Folketingimut ilaasortaq, Doris Jakobsen oqarpoq.
Oqariartuut taanna takkuppoq Dansk Folkepartimi siulittaasoq Kristian Thulesen Dahl oqaaseqaasiormat Folketingimit inatsit unitsinneqartariaqartoq, ministeriuneq Helle Thorning-Schmidt, Socialdemokratineersoq sapaatip akunnerani tusagassiivinnik katersortitsinerminut atatillugu qallunaat akuliunnissaannik tunuartitsisoq.
- Nalunngilarput Dansk Folkeparti suliniutit angisuut tamaasa ilungersuanartorsiortinniaraat Kalaallit Nunaannit annerpaamik pissarsiaqarumalluni. Dansk Folkeparti Kalaallit Nunaannut tunngatillugu nunasiaatilittut pissusilersortuaannarput.
Thorning nersualaarpaa
- Uanga ministeriuneq Helle Thorning-Schmidt nersualaarusuppara kalaallit namminersorlutik ingerlatsinerannik tapersersuimmat, aamma aatsitassanut inatsimmik ataqqinimmat.
- Kalaallit Nunaanni namminersorluni ingerlatsisoqarpoq aamma aatsitassanut inatsiseqalerpugut. Taamaattumik paasiuminaatsippara Dansk Folkepartip suliniutinut angisuunut pilersaarutaasunut akuliunniarsarinera, Doris Jakobsen oqarpoq.
Siumut inatsimmik taaseqataannginnissaminik aalajangerpoq pissutigalugu partiimit kissaatigineqarmat inatsit aallaavigalugu ajornartorsiutaasinnaasunik naliliinissamut piffissaqarnerorusukkamik, taanna kinguaariinnut arlalinnut sunniuteqarsinnaammat. Kisianni partiimit amerlanerussuteqartut aalajangiinerat ataqqineqarpoq, Doris Jakobsen oqarpoq.
DF aamma Enhedslisten isornartorsiuipput
- Toqqissisimanarisorujussuuara aamma naammagisimaarluarpara naalakkersuisut isummiussarimmassuk kalaallit namminneq aalajangiisinnaanerat ataqqineqarmat, Doris Jakobsen oqarpoq.
Inatsit allanngortinneqassappat kalaallit namminneq allanngortissavaat qallunaajunngitsut:
- Allanngortitsisoqassappat Kalaallit Nunaanni inuit qinersineq aqqutigalugu allanngortissavaat, qallunaat Folketingimi politikeriunngitsut - tamakkua paasisinnaanngilaat nunasiaateqarneq taamaatissimasoq - Enhedslistenimiit imaluunniit Dansk Folkepartimit aggerfeqaraluarunik, Doris Jakobsen oqarpoq, partiimi siulittaasoq assigalugu Aleqa Hammonditut suliniutinut angisuunut inatsisip sakkortusaavigineqarnissaanik suliniuteqarusuttoq:
- Soorunami suli pitsaanerusinnaavoq aamma Siumut qinersinerup kingorna pitsanngorsassavaa uagut pissaanermik tigusissagutta. Tamatumali tungaanut inatsit Kalaallit Nunaanni demokraatiskimik aalajangiussaasoq piviusunngorpoq. Tamanna Folketingimi ilaasortat allat ilinniassallugu ataqqisariaqarpaat soorlu ministeriuneq taassumallu partiiata taamannak pigaa, Siumut sinnerlugu Folketingimut ilaasortaq oqarpoq.
- Kalaallit Nunaannut suliartortussat isornartorsiorneqarput taakkua aningaasarsiassaat appasittorujussuussaaq immaqa aamma sulinermik atugassarititaasussat ajorluinnassapput?
Akunnermut 80 koruunit akissarsiat annersaattut taaneqarsinnaanngilaq
- Uagutsinnut pingaarnerpaavoq nunat tamalaat akornanni akissaarsersuinermut inatsisit unioqqutinnginissaat. Aammali eqqarsaatigisariaqarparput kalaallit arlallit suli appasinnermik akissarsiaqarmata, taamaattumik pissutsit tamakku Kalaallit Nunaanni atuutereerput.
- Isumaqarpunga akunnermut 80 koruuneqarluni sulinermi akissarsiassaq qaffagisassaanngitsoq kisiannili taamak akissarsiaqarneq kalaallit akornanni nalinginnaavoq, Doris Jakobsen oqarpoq.