Ove Karl: Inatsisip nunaqavissut suliffissaannik qulakkeerivoq
Politikkikkut akisussaasoq Ove Karl Berthelsen kingumut suliniutinut angisuunut inatsit oqallisaaqisoq illersorlugu saqqummiussivoq
- Erseqqissaatigilara suliniutinut angisuunut inatsisip periarfissaqartinngimmagu nunaqavissumik annermik akissaasersukkamik nunanit allanit suliartortitamik taarsiisoqarsinnaanngimmat. Akissaasiinerluineq eqqartorneqanngilaq. Kalaallit Nunaanni suliamik ingerlatsisinnaasut naleqquttut pigineqanngillat.
Taama inuussutissarsiutinut aatsitassanullu naalakkersuisoq Ove Karl Berthelsen, Inuit Ataqatigiit naqissusiivoq, inatsit naapertorlugu sulinermik inuussutissarsiutillit kattuffii nunatsinniittut nunatsinneersunut atuuttumik nunanik allanit suliffeqarfinnut isumaqatigiinniarsinnaatitaanerat akornusersorneqanngilaq.
- Suliniutinut angisuunut inatsit taamaallaat aatsitassarsiorfimmik pilersitsiniarnermi allanngortitsisinnaavoq. Aatsitassarsiorfik aallartippat pilersitsiniaallutik nunanit allanit suliartortitat nuna qimassavaat. Nunami sulisinnaatitaanermi uppernarsaat sulinermi atugassarititaasunut taamaallaat sammivoq aamma sulisitsisup pisussaaffigaa sulisumik angerlartinnissaat il. il.
- Ingerlatsinermi - aallaavigineqarpoq - nunatsinni sulinermik inuussutissarsiortut isumaqatigiissutaat nalinginnaasut atorlugit nunaqavissut taamaallaat sulisinneqarnissaat, Ove Karl Berthelsen tusagassiivinnut allappoq.
London Miningip Nuup Kangerluani Isukasiani savimminissiorfissamik pilersitsiniarnerani ukiumut sulisut 3000 pisariaqartinneqassapput.
- Illuatunngaani aatsitassarsiorfissaq piareerpat qaarusummi sulisussat 700 missaanniittut pigaavut, Ove Karl Berthelsen oqarpoq, piffissami matuma Korea Kujallermiippoq ilaatigut Naalakkersuisut siulittaasuat Kuupik Kleist, Inuit Ataqatigiit aamma ilinniartitaanermut, ilisimatusarnermut nunanillu avannarlernik suleqateqarnermik naalakkersuisoq Palle Christiansen, Demokraatineersoq peqatigalugit.