Nunaqarfimmi katittorpassuit
Upernaviup avannaani Kullorsuarmi aappariit arfineq-marluk ullumi katipput
12.12.12 imaluunniit 12.12.2012.
Inuit ilaannut ulloq immikkorluinnaq ittoq. Ilami ullup kisitsisaannaaluunniit.
Nunaqarfimmi Kullorsuarmi Upernaviup avannaaniittumi ulloq immikkorluinnaq ippoq. Nunaqarfimmi aappariit arfineq-marluk kommunimi katittut, KNR'ip Radioavisia ilisimatitsivoq.
Ullormi pisut malunnartinniarlugit illu sullissivimmi kaffisortitsisoqassaaq Qaasuitsup Kommunia qaaqqusisoralugu. Kullorsuaq Upernavimmit 300 kilometerinik avannarpasinneruvoq 450-inik innuttaqarluni.
Ullut assigiinnik kisitsisitallit nuannarineqartuaannarput. Immaqa tassunga pissutaavoq maannamiit ukiut 88-it qaangiuppata aatsaat ullup, qaammatip ukiullu kisitsisitai assigeeqqinnissaannut. Taamanikkussaru tassaassammat 01.01.2101, amerlanerpaartattalu taamanikkussamut katinnissamut katinnikuullunilu unnuarsioqatigiinnissamut utaqqisinnaagunanngilagut.
Aappariippassuit ullumi pingasunngornermi nuliariittut uigiittullu taasinnaasut nuannaarutigisariaqassavaat arfininngornermi ukiuni 25-ni katiffissiorumaaramik. Taamak sivisutigisumik aappariissagaluarunik.