D: Qaqortoq suluusalinnut mittarfittaassaqqaarpoq
- Soorunami Qaqortumi timmisartunut suluusalinnut mittarfeqassaaq, Demokraatit politikkikkut oqaaseqartartua, Anda Uldum oqarpoq
- Demokraatit isumaqarput Qaqortumi mittarfittaarumaarput. Tamanna assortuussutigineqarsinnaanngilaq.
Taamak nakissusiivoq politikkikkut oqaaseqartartoq Anda Uldum, maluginiarsimavaa Inatsisartut Sanaartornermik aamma Avatangiisinut ataatsimiititaliaat isumaqartoq, ataatsimiititaliaq Qaqortumi immaqa timmisartoqarfiulerumaartussaq pillugu paasissutissiisukippallaartoq.
- Tamanna tusaatissatut tigussavarput kisianni ataatsimiititaliap paasissutissiinikinnera sammisap qiteranik isertuussissanngilaq tassa Qaqortumi mittarfimmik pilersitsisoqarumaartoq, Anda Uldum tikkuaavoq.
Angallanneq pillugu Isumalioqatigiisitat innersuussutaat paatsuugassaanngilaq. Naqissuserpaa inuiaqatigiit aningaasarsiornerat eqqarsaatigalugu Qaqortumi timmisartunut suluusalinnut mittarfiliornissaq pitsaassaaq peqataanillu Narsarsuarmi timmisartunut suluusalinnut mittarfik matullugu.
Akiitsut aningaasaliinissallu pillugit pilersaarummi 2012-mi upernaakkut Inatsisartut ataatsimiimmata Naalakkersuisunit saqqummiunneqartumi pingaarnersiuineq paatsuugassaanngilaq. Tassani naqissuserneqarpoq Qaqortumi timmisartunut suluusalinnut mittarfiliornissaq pillugu business case-liortoqassasoq, inissiineq 2 Narsarsuup matuneqarnissaa ilanngullugu.
Qaqortumi innuttaasut utaqqinerat naammaqaaq
Ineqarnermut Angallannermullu Naalakkersuisoq Jens B. Frederiksen Kujataani innuttaasunik ataatsimiititsinermi innuttaasunut erseqqissarpaa, Qaqortumi timmisartunut suluusalinnut mittarfiliornissaq innersuulluinnarini. Tamatuma saniatigut Kommune Kujallermi Kommunalbestyrelsimi amerlanerussuteqarluartut Qaqortumi timmisartunut suluusalinnut mittarfiliortoqarnissaa kissaatigaat.
- Demokraatini nalunaarutit tamakku nuannaarutigaagut aamma Inatsisartut upernaamut ataatsimiilernissaat qilanaaraarput, tassani naatsorsuutigigatsigu Qaqortumi timmisartunut suluusalinnut mittarfiliornissaq pillugu Naalakkersuisut siunnersuummik saqqummiussiumaartut. Siunnersuutaajumaartussaq taanna Demokraatini tamakkiisumik tapersersorumaarparput. Qaqortormiut timmisartunut suluusalinnut mittarfissamik naammattumik utaqqereerput, Anda Uldum tutsiuppoq.