Juullimut qiortaalluni nuannisaqatigiinneq
Narsami katersugaasivitoqqap illuini qiortaasoqarlunilu juullerpalaartorsioqatigiittoqarpoq
Arfininngormat ulloqeqaani ualikkullu Narsami umiarsualivitoqqami katersugaasiviup illuutaani juullimut qiortaasoqarpoq juullerpalaarsioqatigiittoqarlunilu kaffisorluni namminerlu sanaanik kaagisorluni.
Katersugaasiviup pisortaata Karina Frederiksenip ukioq manna "juullerpalaartorsioqatigiinneq" kulturip innuttaasullu illuannit A21-mit, katersugaasivimmut A34-mut nuussimavaa.
- Inuit qangarnitsanut aliannaarsaarsinnaapput ilikkagaqarlutillu, katersugaasiviup pisortaa oqarpoq, tupaallaatigilaarpaalu pulaartut apeqqarissaanerat, nuannaarutigeqaalu inuit assitoqaat saqqummersitat, utoqqarnit amerlasuunit suli eqqaamaneqarmata.
Meeqqat uummataasanik qiortaapput, titartaallutik atuakkanik qalipattakkanik qalipaallutik, minnerunngitsumillu orpiliarlutik.
Ulloqeqqani inoqangaatsiaqaaq, ualiartulersorli siallilerluni aqquserngit quatsammata inuit ikiliartuaarput.