GA: Maanna siumut isiginialissaagut
Suliniussuarnut inatsisip aappassaaneerneqarnerata pingajussaaneerneqarneratalu akornanni tusarniaasoqannginnera uggornarpoq, Kalaallit Nunaanni Sulisitsisut Peqatigiiffiat isumaqarpoq, kalaallilli ingerlatsiviisa akulerutsinneqarnissaannik politikkikkut oqaaseqarnerit pitsaasutut isigai
- Suliniussuarnut inatsisip suliarineqarnerata ingerlarnga naleqqussarneqarneralu Kalaallit Nunaanni Sulisitsisut Peqatigiiffiata naammaginngikkaluarlugu qularutissaanngilaq anguniagalimmik suleqataarusuttugut, taamaasilluni suliniutut, inatsisikkut pineqartut, piffissaq ungasissoq isigalugu Kalaallit Nunaata ineriartorneranut iluaqutaaqqullugit.
Taamatut tusgassiorfinnut nalunaarutikkut allappoq Kalaallit Nunaanni Sulisitsisut Peqatigiiffiat, taassumalu IBA-mi isumaqatigiinniarnissat qilanaarai.
- Inatsisip piviusunngortinnissaani siumut isigisumik sulineq sammineqassaaq, inatsit inuiaqatigiinnut tamanut iluaqutaaniassammat. Tamatumunnga atatillugu maluginiarparput suliniussuassat Kalaallit Nunaanni tunngaveqarnissaata pingaaruteqassusianik politikkikkut oqaaseqaatit, taamaasilluni kalaallit ingerlatsivii sulisuilu suliassani sapinngisamik annertunerpaamik akulerutsinneqassallutik.
Sulisitsisut peqatigiiffiata ilanngullugu oqaatigaa Impact Benefit Agreement-imi isumaqatigiinniarnissani paasissutissanik ilanngussaqartarniarluni, naluneqanngitsutullu tassani pineqarput isumaqatigiissutit, suliniussuarni innuttaasut inuussutissarsiortullu qanoq pissarsiaqarnissaannik qilersorsimasumik anguniagassartallit.
Aamma atuaruk: Suliniussuarnut inatsit akuersissutigineqarpoq
- Aamma maluginiarparput inuussutissarsiornermut aatsitassanullu naalakkersuisoqarfiup SIK-mik GA-millu decembarip 6-anni ataatsimeeqateqarnermini ersarissumik oqaatigimmagu "IBA-mik isumaqatigiissut tamarmi tusarniaavigineqassasoq". IBA-mik isumaqatigiinniarnissat tamakkua misiliutaassapput politikkikkut nalunaarutigineqartut eqqussanersut.
Kalaallit Nunaanni Sulisitsisut Peqatigiiffiata neriuutigisimagaluarpaa suliniussuarnut inatsit politikerit januaarimut kinguartikkumaaraat, taamaasilluni inuussutissarsiutinut ataatsimiititaliap sulineratigut allannguutissatut siunnersuuterpassuit juullertinnafgu tusarniaavigineqarniassammata.