Qaarsup tarninga - Inua

Imminut ilinniartilluni assiliisoq Kristian Mainz nunatta qaarsuinik assilisanik atuakkamik saqqummersitsivoq

Kristian Mainz atuakkiaalu nutaaq INUA. Ass.: Arktis Media

Kristian Mainzip assinik atuakkiaa "INUA", kalaallisut, qallunaatut tuluttullu oqaasertalersuaq saqqummersinneqarpoq. Pinngortitamik assilisat 113-it issittup pinngortitaani iluseqarluartumi qalipaatigissaartumilu assilineqarsimapput. Imminut ilinniartilluni assiliisup, ilinniartitsisutut ilinniagaqarsimasup Kristian Mainzip nunatsinni pinngortitap nukii qangamullu takussutissartai takutippai.

- Kalaallit Nunaanni pinngortitami piffimmut takussutissat pinngortitallu nukii ersarinnerpaamik takusarpakka. Tassami Kalaallit Nunaat nunarsuarmi nalissaqanngilluinnarpoq, Kristian Mainz atuakkami, naqiterisitsisarfimmit Atuagkat-mit saqummersinneqartumi, allappoq.

- Silap pissusia pinngortitamik immikkuullarissumik pilersitsiinnanngilaq, aammattaarli nuna qaarsoqarnermigut immikkuullarissuuvoq. Ujaqqat nunarsuarmi pisoqaanerpaat Kalaallit Nunaanniipput. Nunarsuullu affaani kujataanit tektonit avannamut ingerlaarnerat nunamut sunniuteqarsimavoq, Kristian Mainz oqarpoq.

Eskimolog-i ujarassiornermilu professori

Atuakkap imarisaanut arlallit ilanngussisimapput. Assilli tamaasa Kristian Mainzip assilisarigai arlalliat atuakkamut allakkanik ilanngussisimapput. Eskimologi eqqumiitsulianillu ilisimatooq Jørgen Trondhjem atuakkamut ilannguppaa eskimuut oqaluttuatoqaat "Inua - tarneq".

- Tamarmiussutsip ilamerngi takuagut - ilamerngit namminerminni eqqumiitsuliat, nutaamik tamarminngortarput namminneq ilumikkut avatimikkullu kusanassuseqarlutik nukeqarlutilluunniit - inua, misigissutsinik sunniisoq, Jørgen Trondhjem allappoq.

Ujarassiornermi professori Minik Rosing nassuiaavoq pinngortitami nukiit qaarsunit pilersinneqarsimasut.

- Ujarassiuumulli ujarak immikkoortuuvoq tamarmiusoq. Avataata ilusaa qalipaataalu takussutissaanerugunarput ujaqqap sananeqaataanut, qaavanili siullerpaamik takuneqarsinnaapput nukiit, qaqqanik qaarsunillu aseruillutik ujaranngortitsisut, pinngortitami takusinnaasatsinnik, professori allappoq.

Kristian Mainzip, eqqumiitsulianik atuakkamik "Grønlands sjæl" sanaqataasup, pinngortitami assilisani nammineq allallu taalliaannik ilaqartippai.

Powered by Labrador CMS