"Sianiitsuusaarlunilu ilisimasaqanngitsuusaarpoq"
Suliniussuarnut inatsisip oqallisigineqarnerani qajassuussisoqanngilaq, kingullermik Siumut nalunaarpoq inatsisartunut qinersinermi ajugaassagunik inatsit isumaqatigiinniutigineqaqqissasoq, maannalu Per Berthelsen aamma Siumumeersoq isumaqarpoq Maliina Abelsen sianiitsuusaarlunilu ilisimasaqanngitsuusaartoq
Naalakkersuisooqatigiit illua'tungiliuttullu suliniussuarnut inatsisip suliarineqarnerata oqallisigineqarnerani isumaqatigiinngitsorujussuupput, pisuutitsisoqaqattaarporlu, kingullermik Siumumeersoq Per Berthelsen allappoq, aningaasaqarnermut Naalakkersuisoq Maliina Abelsen sianiitsuusoq ilisimasaqanngitsuullunilu - niviarsiaqqatullu nipeqarluni oqaluttartoq.
Taamatut allappoq Kim Kielsen pillugu allaaserisamut oqaaseqaammini, tassani Kim Kielsen oqarsimammat inatsimmut tassunga kanngusulluni. Aamma Per Berthelsen kanngusunnerarpoq isumaqarlunilu naalakkersuisooqatigiit inatsit nukingiussimagaat - tamannalu makitaniarnermut takussutissaasoq.
Allaaserisamut qulaani pineqartumut oqaaseqaammini Per Berthelsenip oqaaseqaataa tamaat Semitsiaq.AG-p ilannguppaa:
...Inatsisartuni taasinermi pingasut qinigassaapput: Isumaqataalluni * Akerliulluni * isumaqataananiluunniit akerliunani. Tamarmik oqimaaqatigiipput tamarmillu immikkut atorsinnaassuseqaqatigiillutik, taamatullu ataqqineqartariaqarlutik.Inatsisip suliarineqarnerani oqartussaaqatigiittut qinigassat taakkua pingasut Aningaasanut Naalakkersuisup Maliina Abelsenip ataqqisinnaanngimmagit tamassuma takutippaa, suna pineqartoq ilisimanngilluinnaraa. Akerlianik Aqqaluaq B. Egede piviusut naapertornerullugit oqarpoq, suliniussuarnut inatsisip aappassaaneerneqarnerani Siumup isumaqataalluni taasinnginnera uggoralugu. Siumut isumaqataananiluunniit akerliunngimmat tamassuma ersarissumik takutippaa partii isumaqartoq, inatsisip aappassaaneerneqarnissaa sioqqullugu tunngavik sulinerlu naammasimanngitsut, naammattumillu naammaginassuseqaratik - tassa imaappoq, inatsisissatut siunnersuutip suliarineqarneranut tunngavik Siumup kasiilerpaa.
Ernumanarpoq Malene Abelsen niviarsiaqqatut nipeqarluni taama akulikitsigisumik "sianiitsuusaartarmat ilisimasaqanngitsuusaartarlunilu".
Siumut ISUMAQATAASIMASUUPPAT tamanna partiip suliamut inerneqarsimanngitsumut isumaanut akerliulluinnassagaluarpoq, AKERLIUSIMAGALUARPALLU suliffissaqartitsinermut periarfissanik nutaanik pilersitsinissamut mattussinerulluinnassagaluarpoq, Landskarsimullu, siullermeersumik paatsoorneqarsinnaanngitsumik IA-mit Naalakkersuisunut ilaasortamit Ove Karl Berthelsenimit "imaarussimasutut" nassuerutigineqartumut, isertitassaasinnaasunut mattussinerussalluni.
Siumup isornartorsiugaanut aamma ilaavoq inatsimmik aappassaaneerussinerup pingajussaaneerussinerullu akornanni nalinginnaasumik sivikinnerpaamik ulluni pingasuni eqqarsarfissaqartarnerup atorneqannginnera, tassami Inatsisartut ataatsimiititaliaata isumaliutissiissutaani paragrafini 22-ni 21-nik allannguutissasut siunnersuuteqartoqarpoq, tassanilu ilaasariaqarsimagaluarpoq suliaq soqutigisaqaqatigiinnut attuumassutilinnut nutaamik tusarniaavigineqassasoq. Periuseq tamanna nalinginnaasumik taamaallaat saneqqutaarneqartarpoq akitsuutinik assigisaanillu eqqussinermi, aammalu siunnersuut pingaannginneq/soqutaannginneq TAMAKKIISUMIK isumaqatigineqaraangat.
Suliussuarnullu tunngasut sammineqarneranni avatangiisit naammaginninnginnerat ernumassuteqarnerallu qiviarutsigu, suli paasiuminaannerulerpoq tamassuma tuaviuunneqarnera. Makitaniarneruvoq oqartussaaqataanermillu asissuinerulluni, innuttaasunik TUSAGASSIORFINNILLU aalassatsitserujussuartariaqaraluartoq, tamannali piumasarissallugu ingasappallaarunarpoq, ukiuni 3,5-ini misilittakkavut eqqarsaatigalugit...