IA: Nukittunerusumik inissisimalerpugut
Aatsitassanut inatsit Inatsisartuni akuersissutigineqaqqammerpoq. 13-it isumaqataallutik taasipput akerliullunilu taasisoqanngilaq. IA-p nuannaarutigaa piaaffimmik ingerlatsinissamut isumaqatigiinnarnermi Kalaallit Nunaata nukittunerusumik inissisimalernissaa
- Suliniussuarnut inatsit qulakkeerinneqataavoq kalaallit ingerlatsiviisa, kalaallit sulisartut, sulisartut nunat allamiut, soqutigisaqaqatigiit innuttaasullu naammaginartunik atugassaqarnissaannik, naleqassutsinik, siuariartornermik pilersikkusutatsinnik takutitsisumik.
Suliniussuarnut inatsit, Kalaallit Nunaanni piiaaffinnik ingerlatsinissamik siuarsaasussaq, akuersissutigineqaqqammersoq pillugu tusagassiorfinnut nalunaarummi taamatut allappoq Inuussutissarsiornermut Ataatsimiititaliap siulittaasua Naaja Nathanielsen, IA.
- Alloriarneq tulleq tassaassaaq qallunaat naalakkersuisuinik, nunat allamiut pillugit inatsisissatut siunnersuutissaat pillugu isumaqatigiinniarnerit, tamatumalu kingorna taanna Folketingimi isumaqatigiinniutigineqassaaq. Suliassaq taanna naammassereerpat selskabinik isumaqatigiinnarinerit aallartinneqarsinnaapput, Naaja Nathanielsen oqarpoq.
Suliniussuarnut inatsisip oqallisigineqarnerani suliniutigineqarneranilu paasissuterpassuarnut isummanillu saqqummiussarpassuarnut qujarusuppoq.
Aamma atuaruk: Kinamiut aggissapput
Aamma atuaruk: Naaja: Kinguartitsinissaq pisariaqanngilaq
Aamma atuaruk: Inatsit taanna kanngusuutigaara
Aamma atuaruk: Aleqa: Aap, oqaluttuarisaanermut pingaarutilik, kisiannili...
Aamma atuaruk: London Mining ajorinnippoq
- Isumaqarpugut inatsit taanna atorlugu Kalaallit Nunaat selskabinik, suliniussuarnik aallartitserusuttunik, isumaqatigiinniarnerni nukittunerusumik inissisimalissasoq.
Taassuma oqaatigaa suliniussuarnut inatsisip akuersissutigineqarneratigut qulakkeerneqartut:
* Ingerlatsinermi ammasuuneq, atortut ilaat tamanut saqqummiunneqartassallutik, soorlu sulisartut nunat allamiut akissarsiatigut atugarisaat.
* Inatsimmik tunngavilimmik tusarniaasarnissaq, innuttaasut soqutigisaqaqatigiillu akulerutsillugit.
* Suliniutinut akuersissuteqartoqartinnagu Inatsisartut ataatsimiititaliaannut paasissutissiisarnissaq.
* Akuersissuteqartoqartinnagu sulisartut sulisitsisullu kattuffiisa, kiisalu peqatigiiffiit kattuffiillu avatangiisit illersorneqarnissaannik, inuiaqatigiinni atasinnaassutsimik imaluunniit inuit pisinnaatitaaffiinik suliniutillit akulerutsinneqartarnissaat. Tamakkuttaaq akulerutsinneqartassapput IBA-mik isumaqatigiissutit suliarineqarneranni (impact benefit agreement-imik isumaqatigiissutit imaluunniit pingasoqiusat isumaqatigiissutaat)
* Akuersissuteqartoqartinnagu IBA-mik isumaqatigiissutit suliarineqartarnissaat, makkualu imarissavai:
° kalaallit sulisartut ilinniagaqarnissaannik ilinniaqqinnissaannilluunniit aalajangersakkat aammalu kalaallit ingerlatsiviisa piginnaasaasa ilisimasaasalu ineriartortinnissaat ineriartorteqqinnissaalluunniit. Tassanissaaq allassimassapput kalaallit inuiaqatigiit kissaataat, assersuutigalugu kulturimut timersornermulluunniit tapiissutit.
° sulisartut nunat allamiut akunnermut tunngaviusumik akissarsianit kalaallit kattuffiisa akornanni isumaqatigiissutigineqartunit minnerusumik akissarsiaqartinneqarsinnaanngillat, killilerneqarsimavorlu sulisitsisup akissarsianit taakkunannga qanoq annertutigisumik ilanngaasinnaanera.
° Erseqqissarneqarpoq sulisartut nunat allamiut sulinerminni atugassaqartinneqassasut nunami maani atugassarisanut atuuttunut naapertuuttumik.
° Inuit kattuffiilluunniit attuumassuteqartut Naalakkersuisut aalajangiinerinut maalaaruteqarsinnaasut.