Naaja: Kinguartitsinissaq pisariaqanngilaq

Inatsisartut inuussutissarsiornermut ataatsimiititaliaani siulittaasoq Naaja Nathanielsen, IA, oqarpoq aatsitassanut suliniussuarnullu inatsisip aappassaaneerneqarnerata pingajussaaneerneqarneratalu akornanni piffissaq sivikitsoq, ullormik unnuarmillu ataatsimik sivikinnerusoq, akuerineqarsinnaasoq - pissutigerpiarlugu ataatsimiititaliap kissaatai Naalakkersuisut malimmatigit:

- Oqaatigiuarsimavara Naalakkersuisut allannguutissatut siunnersuutaat inuussutissarsiornermut ataatsimiititaliap kissaataanut naapertuuppata, aappassaaneernissaanut pingajussaaneernissaanullu ullup ataasiinnaanissaanut isumaqataallunga, Naaja Nathanielsen Sermitsiaq.AG-mut oqarpoq nangillunilu:

Kinguartinnissaanik kissaatigisamut akerliunngitsoq
- Akerlianik pingajussaaneernissaata kingusinnerusukkut pinissaanik siunnersuuteqarnissannut piareersimasimavunga, Naalakkersuisut allannguutissatut siunnersuutat naammagisimanngitsuugukkit, taanna oqarpoq.

Atuaruk "Imarisaa nersualaarpaat, periuserli pinnagu"

Inatsisip suliarineqarnerata naajartulernerani arlalinnit isornartorsiorneqarsimavoq inatsisip ippassaq aappassaaneerneqarnerata ullumilu tallimanngornermi pingajussaaneerneqarnissaanut ulloq ataasiinnaammat.

Ilaatigut Kalaallit Nunaanni Sulisitsisut Peqatigiiffiannit Transparency Greenlandimillu, ammattaarli partiimit illua'tungiliuttumit Siumumit:

- Aappassaaneerneqarnerata pingajussaaneerneqarneratalu akornanni piffissamik sivisunerusumik atorfissaqartitsisoqarpoq, taamaasiluni allannguutissatut siunnersuutit kinguneqaatissaannut innuttaasut kattuffiillu paasinninnissaminnut oqaaseqaateqarnissaminnullu piffissaqarniassammata, ippassaq aappassaaneerneqarnerani Siumut oqarpoq.

Ataatsimiititaliap immikkut ataatsimeeqqinnissaa ujartorpaa
- Siumut isumaqarpoq aappassaaneerneqarnerata pingajussaaneerneqarneratalu akornanni ataatsimiititaliaq pinngitsoorani ataasiarluni ataatsimeeqqittariaqaraluartoq, naalakkersuisooqatigiilli isumaqarput tamanna pisariaqanngitsoq, Siumut oqarpoq.

Atuaruk "Siumut taaseqataanianngilaq"

Naaja Nathanielsenilli qularutiginngilaa pingajussaaneerneqarnerata kinguartinnissaa akuerineqassagaluartoq, tamanna inuussutissarsiornermut ataatsimiititaliap kissaatigisimasuuppagu:

- Kinguartitsinissaq ataatsimiititalip kissaatigisimasuuppagu qularutiginngilara siulittaasoqarfiup (Inatsisartuni, aaqqiss.) akuerisimassagaluaraa, taanna oqarpoq.

Atuaruk "Qinersinerup kingorna suliniussuarnut inatsit sakkortusiniarpaa"

- Isumaqarpit Naalakkersuisut nalusimanngitsuuppassuk pingajussaaneernissaata kinguarteqqinnissaanut ´akerliusimassanngitsutut´ taava Naalakkersuisut isumaliutissiissutersi atornerusimassagaluaraat?

- Qinnuigaarma Naalakkersuisut qanoq eqqarsarsimanerat qanoq paasineriga oqaatigeqqullugu, taamaattumillu eqqoriaanerussaaq. Isumaqanngilanga Naalakkersuisut ataatsimiititaliamit tatineqartutut misigisimasimasut. Isumaqarpunga Naalakkersuisut takusimassagaat ataatsimiititaliap allannguutissatut tikkuagai allanit aamma tikkuarneqarsimasut. Isorinnittut kissaataat ataatsimiititaliap pinngitsoorani malinniarsimanngilai, misissorsimavagulli tamannalu tunuliaqutaralugu nammineq siunnersuusiorluta. Ingerlatsinerlu tamanna Naalakkersuisut malissimavaat pingasoriarluni isumasioqatigiinnikkut allakkatigullu apeqquterpassuartigut. Taamaattumik aqqutaani ataatsimiititaliap isumaliutai malinnaaffigisinnaasimavaat, Naaja Nathanielsen oqarpoq.

Atuaruk "Aleqa: Aap oqaluttuarisaanermut pingaaruteqarpoq... kisiannili"

Sermitsiaq.AG-p quppernermini taasisitsinerani inernerugallartumi takuneqarsinnaavoq atuisartut 2/3-liisa missaat isumaqartut pitsaanngitsoq inatsisit taakkua marluk, Naalakkersuisut illua'tungiluttullu oqaluttuarisaanermut pingaarutilittut taasaasa, aappassaaneerneqarnerisa pingajussaaneerneqarnerisalu akornanni ulloq unnuarlu ataasiinnaammat.

Atuaruk "Kuupik: Oqaluttuarisaanermut pingaarutilik"