Qinersinerup kingorna suliniussuarnut inatsit sakkortusiniarpaa
Qinersinissami Siumut ajugaassappat suliniussuarnut inatsit suliareqqinneqassaaq. Partiip ´inatsit pitsanngorsarniarpaa inuiannut kalaallinut iluaqutaasumik´, partii oqarpoq. Iluarsiinissallu pisariaqarsinnaapput, IA isumaqarpoq
Suliniussuarnut inatsit Inatsisartut qularnanngitsumik ullumi, tallimanngornermi, akuersissutigissavaat.
Maannangaarli partii illua'tungiluttoq angisooq Siumut aalajangereerpoq, suliniussuarnut inatsit oqaluusereqqinneqassasoq ´pitsanngorsarneqassasorlu´, partii qinersinermi ajugaassappat, allannguutissanullu amerlanerussutilinnik pissarsisinnaassaguni.
- Qinersinerup kingorna amerlanerussutillit inatsit pitsaanerulerseqqikkusuppassuk, nunatsinni pinngortitap pisuussutaanik piginnittunut - inuiannut kalaallinut - iluaqutaasumik, Siumut oqarpoq.
Suliniussuarnut inatsit ullumi Inatsisartuni pingajussaaneerneqarpat Siumut taaseqataanianngilaq.
Qanoq iliuuseqarsinnaanngippasissut
Tamannalu IA-meersup Naaja Nathanielsenip, Inatsisartut inuussutissarsiornermut ataatsimiititaliaanni siulittaasup, uggornartippaa, Siumut peqataatikkusukkaluaramiuk:
- Siumut peqataatikkusuttorujussuugaluarpara. Pingaartumik pissutigalugu Inuussutissarsiornermut Ataatsimiititaliaq sulineq isumaga malillugu anguniaqarfiusorujussuusimammat ammasorujussuusimallunilu. Isumaqataallutilli taasiumanngimmata, paasisinnaanngilluinnarpara taaseqataajumanngimmata, taanna oqarpoq nangillunilu:
- Allaanngilaq akerliuniaannavillutik teqeqqumut imminnut inississimasut. Isumaqataallutik taasiumanatik. Aamma akerliullutik taasisinnaanngillat, taamaassappat isikkoqassammat Inuussutissarsiutinut Ataatsimiititaliap allannguutissatut siunnersuutaani 21-ni peqataasimanngitsut. Taamatut isummerneq eqqumiiginarpoq allaanngilarlu qanoq iliuuseqarsinnaarpasinngitsut, Naaja Nathanielsen Sermitsiaq.AG-mut oqarpoq.
Inatsit eqqorluinnartuunngitsoq
Qinersinerup kingorna Siumup suliniussuarnut inatsit isumaqatigiinniutigeqqinniaraa Naaja Nathanielsenip tunuartinngilaa suliniussuarnut inatsit piffissap ilaani iluarsaattariaqalersinnaasoq:
- Suliniussuarnut inatsit eqqorluinnartuunngilaq. Inatsit sunaluunniit taamaanngilaq. Aatsitassanut inatsisitulli kingusinnerusukkut iluarsaattariaqassavarput. Kisiannili aamma inatsit ajortuunngilaq. Pipallatamik inatsisiliorneq isumaqatiginngilara, isumaqanngilangalu inatsit pipallataasoq, uannulli politikkikkut imarisaa pingaarnersaavoq, Naaja Nathanielsen oqarpoq.
- Tamanna pissutigalugu inuit qinigaat inatsisiliortarput, inatsisilerituujunngitsut 31-t. Isumaqarlungalu inatsisikkut tassuuna politikkikkut pingaarutilinnik nalunaaruteqartoqartoq.