Savaateqarlualernissamut periarfissaqarluartoq

Nunatsinni savat marloriaammik amerlassuseqalersinnaapput. Taama Kujataani savaatilik CNN-imut naliliivoq

Nunatsinni savaateqarneq periarfissalerujussuuvoq, savaatilik isumaqarpoq. Tamannalu savaaqqat neqaannik amerlanernik isumaqarsinnaavoq. Asseq: toqqorsivimmit

Amerikamiut nutaarsiassaqartitsiviat nunarsuarmut tamarmut siammarsimasoq CNN silap pissusaata allanngornera tunngavigalugu Kalaallit Nunaannik sammisaqalerpoq.

Allaaserisat assigiinngitsut marluk atuarsinnaavatit maani aamma maani.

Allaaserisap aappaani silap pissusaata allanngoriartornera malillugu periarfissanut nutaanut pilersinneqartunut tunngavoq, tamatumanilu CNN-imi nunatsinni savaaqqanik tunisassiorneq ilaatigut sammineqarpoq.

CNN-ip Kujataani savaatilik Aqqalooraq Frederiksen pulaarpaa, taannalu eqqoriaavoq nunatsinni savat ullumikkut 20.000-it missannik amerlassuseqartut siunissami marloriaatinngorlutik 40.000-inik amerlassuseqalernissamut periarfissaqartut.

Periarfissaqarluarpoq, aammali unammilligassaqarluni
- Maani nunatsinni ivigartortitsivissanik nassaarniarneq ajornakusoortorujussuusaraluarpoq, ivikkat maani naajartortanngimmata. Kisianni pissutsit pitsaanerulerput, allaammi amerlanernik savaateqarsinnaaleraluarpugut. Ullumikkut 20.000-it missaannik savaateqarpugut, taakkuali ajornanngitsumik 40.000-inik amerlassuseqalersinnaagaluarput ullumikkut ivigartortitsiviusinnaalersut eqqarsaatigalugit, Aqqalooraq Frederiksen CNN-imut oqarpoq.

Aqqalooraq Frederiksenili oqarpoq, savaateqarnerup ineriartortinnissaanut attaveqaatilunneq akornutaasinnaasoq. Savaaqqat neqaannik atuisartunut assersuutigalugu Nuummiittunut assartuiniarneq ajornakusoortuuvoq, pisariaqartitallu ilarpassuit Danmarkimit tikisinneqartariaqartarput aningaasartuutaaqisumik.

Ajornartorsiutilli tamakku siunissami ungasinnerusumi aaqqinneqarsinnaapput, Aqqalooraq Frederiksen isumaqarpoq.

Powered by Labrador CMS