Katuami Tunumik nuannarisaqarneq
Franski eqqumiitsuliortoq kulturikkut illorsuarmi Katuami qalipakkaminik saqqummersitsivoq. Tasiilamit aamma Tiniteqilaamit 'silarsuarmut allamut pulasarnermit' naammassisani saqqummersillugit
Aqagu sisamanngornermi Katuaq eqqumiitsulianik saqqummersitsineq nutaaq ammassavaa, franskeq assilialiortartoq Isabelle Vasseur, Kalaallit Nunaanni immikkut misigissuseqartoq saqqummersitsissalluni.
Ukiuni kingullerni Tunu tikittarpaa - ilaatigut Tasiilaq aamma Tiniteqilaaq - aamma saqqummersitsinermi qalipakkani takuneqarsinnaavoq Tunumi suut isumassarsiorfigisarnerai.
- Qalipaasarnerminut Kalaallit Nunaat pinngitsoortissinnaanngilaa uterfigijuartuarlugulu. Isabelle Vasseur-imut misigissutsit Kalaallit Nunaata pilersittangai qalipaatilluni silarsuarmut allamut pulasarnermut assersuunneqarsinnaanerarpai, Katuaq tusagassiivinnut allappoq.
Saqqummersitsineq Det Franske Institut aamma Den Franske Ambassade suleqatingalugit ingerlanneqarpoq - tassunga atatillugu franskit filmiliaat 'The Artist' marloriarluni piffissami aggersumi Katuami takutinneqassaaq - akileeqqaarani iserluni.
Saqqummersitsineq decembarip 20-ata tungaanut ingerlavoq.