EU nannut tunineqartarnerannik inerteqquteqalerniarpoq
Europa Parlamenti sisamanngornermi nannut tunisaasarnerat pillugu ataatsimiinniarpoq. Nunatsinnit Nunavumillu sinniisut inerteqqutarniarnermut akerlilersuiniarput
Naggueqatigiit Inuit Kalaallit Nunaanni Canadallu avannaani nannunniartarnerat sisamanngornermi Bruxellesimi aalisarnermut, piniarnermut nunalerinermullu naalakkersuisoqarfimmi allaffiup pisortaanit Amalie Jessenimit aamma Canadami inuit kattuffianni 'Inuit Tapiriit Kanatami'-mut siulittaasumit Terry Audlamit illersorniarneqassaaq.
Tamanna pissaaq naggueqatigiit Inuit nannunniartarnerat Europa-Parlamentimi sisamanngornermi oqaluuserineqalerpat. Silap pissusaata allanngorneranut, uumasoqassutsimut nungusaataanngitsumillu periuseqarnermik pitsanngorsaanissamut suleqatigiissitaq Pat the Cope Gallagherimit siuttuuffigineqartoq ataatsimiigiaqqusisuuvoq matuminnga qulequtaqartumut: ’Niuerutiginninnissamik inerteqquteqarneq nannut piujuaannartinneqarnissaannik qulakkeerisuussava?’
Tassanilu aalisarnermut, piniarnermut nunalerinermullu naalakkersuisoqarfimmi allaffiup pisortaa Amalie Jessen aamma saqqummiussissaaq, Terry Audlalu Canadameersoq aamma saqqummiussissalluni.
USA-mi naalakkersuisunut, Europakommissionimut Canadamilu naalakkersuisunut sinniisut ataatsimiinnermi aamma saqqummiussissapput.
Nannut nioqqutigineqartarnerannik inerteqquteqalernissamik apeqqut kingullermik 2010-mi CITES-imi ataatsimeersuartoqarnerani oqaluuserineqarpoq, tamatumanilu uumasunik illersuiniaqatigiiffiit nannut nioqqutigineqartarnerannik inerteqquteqarluinnalernissamik qinnuteqaataat taasinermi itigartinneqarluni.
- Nanoq aarlerinartorsiortitaanngilaq, Canadami nannunit tamanit 2 procentiinnaat - 300-t missaanniittut - nannunnianit pisarineqartarput, Nunavumi avatangiisinut ministeri James Arreak qanittukkut Nunavut Newsimut oqarpoq.