Kingusinaartinnat tusaaneqarit
Naammassiartuaaleqaat - tallimanngornermi Kalaallit Nunaata nutaaliaasup tunngavissaa inissinneqassaaq suliniutinut angisuunut aamma aatsitassanut inatsit nutaaq qularnanngitsumik akuersissutigineqarpat
Inatsisartut aqagu sisamanngornermi aamma tallimanngorpat aatsitassanut inatsisissaq nutaaq aamma suliniutinut angisuunut inatsit aappassaaneerlugulu pingajussaanissaavaat.
Inatsisit taakku tamarmik Kalaallit Nunaata siunissaanut pingaaruteqartorujussuussapput.
Inuiaqatigiinni oqallinneq malunnarpoq aamma maani Sermitsiaq.AG'mi oqallinneq ingerlanneqarluarpoq maannali oqallinnissamut periarfissaq kingulleq atorneqarsinnaalluni politikerinik sunniiniarsinnaagaanni inatsisissamut aappimik naaggamilluunniit taasisoqassanersoq.
Taamaattumik Sermitsiaq.AG taasivissaq nittartakkap saqqaanut ikkunneqarpoq, Facebook aqqutigalugu siunnersuutinut marlunnut oqaaseqarsinnaaffiit - taamallu nunatsinni politikerinik isummannik annissillutit.
Allannguutissat
Inatsisartuni inuussutissarsiornermut ataatsimiititaliap ataasinngornermi inatsisissatut siunnersuutit marluk saqqummiuppaat. Tassani - piffissami kingullermi oqallinnerujussuaq aallaavigalugu siunnersuutinut marlunnut allannguutissanik siunnersuuteqartoqarluni.
Pingaartumik nunanit allanit suliartortussat inuussutissarsiornermik ataatsimiititaliamit sammineqarput:
- Allannguutissat arlallit siunnersuutigaagut taakkua suliniunut angisuunut paragraf 10-mi ilanngunneqarpoq sulisunik atorfinitsitsinermut attuumassuteqartut - aamma uanga naatsorsuutigaara paragraf 10-nngortussaq manna tikillugu siunnersuutigineqartumit allaanerussasoq, inuussutissarsiornermik ataatsimiititap siulittaasua Naaja Nathanielsen, IA Nuuk TV'mut oqarpoq.
Inuussutissarsiornermut ataatsimiititaliap taamaaliornermigut qulakkeerniarpaa aatsitassarsiorfiit sulisumik aningaasarsiaannik ilanngartuivallaannginnissaat, ineqarnermut nerisaqarnermullu aningaasarsianik piiaanermikkut.
- Kissaatigaarput atorfinittussaajumaartussat ajunngitsunik atugaqartinneqarnissaat tamakkulu inatsimmi erseqqissaatigineqarnissaat kissaatigaarput, Naaja Nathanielsen Nuuk TV-mut oqarpoq.
Sermitsiaq.AG'p saqqaagut aatsitassanut suliniutinullu angisuunut inatsisissaq qanoq isumaqarfiginerlugu una atorlugu politikerinut isummiussatit pillugit allagit, taamaasillutit qulakkeerinneqataassaatit Kalaallit Nunaata siunissa pillugu.