Inuilimi pisortanngorluni angerlamut utertoq
Poul Christensen februaarip aallaqqaataani 2013 Narsami inuussutissalerinermik ilinniarfimmi Inuilimi nutaatut pisortanngorpoq
49-nik Poul Christensen Narsami inuussutissalerinermik illinniarfimmi Inuilimi pisortassatut toqqagaavoq.
Siulersuisut Poul Christensenimik ilinniarfimmi pisortassatut toqqaanermikkut suliffeqarfik 'iternga tikillugu' suliassamik ilisimaarinnilluartumik ittoqalissaaq, Inuilip siulersuisuini siulitaasoq Josef Therkildsen oqarpoq.
- Poul Christensenip Narsami inunngorsimanerata saniatigut taamallu nunaminut angerlarneratigut ilinniarfik inuusuttut silarsuaanik ilisimasaqarluartumik pisortaqalissaaq. Kommuneqarfik Sermersuumi pisortattut atorfimmini kingullermi Poul Christensen Piareersarfimmi pisortatut sunniuteqarsimaqaaq pingaartumi piffissami kingullermi inuusuttut ilinniarfissaannik pilersitseqataanermigut, Josef Therkildsen itisiliivoq.
Sinnattut piviusunngortut
Atuarfimmi pisortanngortussap suliassani nutaaq pillugu oqarpoq:
- Qangali sinnattorisarsimasaq maannakkut piviusunngorpoq. Inuit qassit nunaminnut uterlutik suliaminnik nangitsisinnaagamik? Nuannaarutigisorujussuuara, taamak oqartariaqarpunga, Poul Christensen oqarpoq.
Poul Christensen, 1992 aallarnerfigalugu inuusuttuaqqat taakkualu ilinniartitaanerat suliffigisimavai, taamannak suliaqarniarluni aalajangiussimalluni pisortatut ilinniakkat arlallit aallussimallugit.