Umiarsuit tallimat RAL'ip taamaatiinnartariaqarpai
Royal Arctic Line-p umiarsuassani tallimat inniminnereernikuuai taakkununnga 400 millioner koruunit akiliutigereerlugit, umiarsuilli sananeqarsinnaanngillat tyskit umiarsualiorfiat akiliisinnaajunnaarmat
Royal Arctic Line umiarsuaatiminik nutarterinissani kinguartingaatsiartariaqarpaa.
Tyskit umiarsualiorfiata P&S Werftens akiliisinnaajunnaarata kingunerisaanik umiarsuit tallimat nutaat pillugit isumaqatigiissutit umiarsualiorfiup tungaanit atorunnaarsinneqarput, Royal Arctic Line tusagassiivinnut nalunaaruteqarput.
Royal Arctic Linep sulisuisa Tysklandimi Stralsund qimappaat, aamma siumut akiliutigineqareersut 400 mio. koruunit missaanniittut aningaaserivinni qularnaveeqqutitigut (refundment guarantees) utertinneqarnissaat piumasarineqarpoq
- Umiarsualiviup akiliisinnaajunnaarnera malittaralugu alianaqaaq, kisianni neriuppugut pilertortumik paasisaqassalluta aamma umiarsuarnik nutaanik allami inniminniisinnaasalluta, Royal Arctic Linep pisortaanera Jens Andersen oqarpoq, taanna isumaqarpoq Royal Arctic Linep tyskit akiliisinnaajunaarnerat siumut ilisimasinnaasimanngikkaa:
- Uagut sukumiisorujussuarmik piareersarpugut, siunnersuisugut pikkorissuullutik aamma sanaartortitsineq Tysklandimi aningaaseriviit aningaasaliissuteqartut annersaasa ilaannit, KfW-mit, aningaasaliiffigineqarpoq. Taamaattumik aarlerinartoqarsinnaaneranut malunnartunik takusaqartoqarsimanngilaq tassanngaannarluinnartumik pisoqarnerata tungaanut, Jens Andersen nassuiaavoq.
Royal Arctic Linep akiliutigigallarsimasani 400 millioner koruunit utertikkunigit ingerlatsivik umiarsualiorfimmik nutaamik qinaasilissaaq isumaqatigiissusiorlunilu - naatsorsuutigineqarluni umiarsuit nutaat siulliit 2014 naanerani naammassisinnaassasut.