GME oqaaseqaatimigut uppertitsiniaavoq
Greenland Minerals & Energy politikerinik uppertitsiniaavoq, Sara Olsvig, Folketingimut IA sinnerlugu ilaasortaq oqarpoq. Nunanut allanut ministerip naqissuserpaa, uranimik tunisassiortoqarsinnaanera Kalaallit Nunaata kisimiilluni akisussaaffigigaa
Nunanut allanut ministeri Villy Søvndal, SF, Kalaallit Nunaanni uranimik tunisassiorneq tapersersunngilaa.
Tamanna Udenrigsministeriamit tusagassiivinnut allakkami takuneqarsinnaavoq. Taamannak nalunaaruteqarneq aallaaveqarpoq Greenland Minerals & Energy, GME, sapaatip akunnerata ingerlanerani illuatungerpiaanik tusarliussaqarmat, tassa; Villy Søvndahlimit Kalaallit Nunaanni uranimik tunisassiornissaq akuerineqarsimasoq.
GME ilaatigut allappoq ilaatigut Danmarkimit tapersersorneqarneq aallaavigalugu Kuannersuarni ujaqqanik aatsitassanik qaqutigoortunik akulinnik piiaanissamut pilersaarummik ingerlatseqqiinnarlutik.
Inuit Ataqatigiit sinnerlugit Folketingimut ilaasortamit Sara Olsvigimit tamanna politikerinik uppertitsiniaanertut taaneqarpoq.
Siullertut Danmark aamma Kalaallit Nunaat uranitaqanngilluinnartumik piiaasoqarnissaanik politikkeqarput. Aappaatut Kalaallit Nunaata kisimiilluni aalajangersinnaavaa uranimik piiaasoqassanersoq.
Namminersorlutik Oqartussat aatsitassanut suliassaqarfik 2010 tiguaat, suliassaqarfimmut oqartussaallutik, inatsiseqarnermut aamma allaffissornermut tunngasuni.