Ataatsimiititaliaq: Jens B ajuusaarnaq.

Inatsisartuni sanaartornermut avatangiisinullu ataatsimiititaliamit Jens B. Frederiksen naammagisimaarneqanngilaq. Naammaginartumik paasisitsiinngilaq, tutsiuppoq

Inuit Ataqatigiit sinnerlugit Inatsisartunut ilaasortaq, Juliane Henningsen. Assi: Leiff Josefsen

Inatsisartuni sanaartornermut avatangiisinullu ataatsimiititaliaq tusagassiorfinnut nalunaarutikkut ineqarnermut, attaveqarnermut angallannermullu naalakkersuisoq Jens B. Frederiksen, Demokraatit naammagisimaarneqanngilaq. .

Jens B. Frederiksenip ataatsimiititaliaq Qaqortumi timmisartoqarfissatut pilersaarummik tassungalu misissuinerit pillugit ilisimatitsisimanngilaq - naak ataatsimiititaliamit arlaleriarluni erseqqissaatigineqaraluartoq, angallaneq pillugu ataatsimiititaliarsuup sanaartugassatut innersuussutaanik atuutsikkiartuaartoqarneranik malinnaarusukkaluarlutik.

Tamanna ajuusaarnarpoqm ataatsimiititaliap siulittaasua Juliane Henningsen, IA Inatsisartuni sanaartornermut avatangiisinullu ataatsimiititaliaa sinnerlugu allappoq.

Ataatsimiititaliamit pingaartumik iluarineqanngilaq tusagassiuutit aqqutigalugit Kujataani ataatsimiittoqarsimaneranik tusartinneqarnertik, taqqavani Kommune Kujalleq Qaqortumi timmisartoqarfissap inissaanut tunngasumik nalileeqquneqarsimallutik.

Ajuusaarnarpoq
Kingorna Jens B. Frederiksenimik oqaloqateqarnermi paasinarsivoq Qaqortup eqqaani timmisartoqarfissamut misissuinerit siulliit ingerlanneqarsimasut, kisianni misissuinerit allat aamma ingerlanneqaqqaassasut ingerlatsinissamik pilersaarutivimmik Qaqortumi timmisartoqarfimmik pilersitsinissamik aalajangiinermut tunngaviusussanik pilersaarusiortoqarumaarluni, Juliane Henningsen oqarpoq, nangillunilu:

- Ataatsimiititaliamit ajuusaarutigaarput tusagassiuutitigut nipeqarmat Naalakkersuisut Narsarsuarmi timmisartoqarfiup Qaqortumut nuunneqarnissaanik aalajangiisimasut, misissuinerparujussuit aatsaat ingerlanneqareerpata Inatsisartut tassunga tunngasunut aalajangiijumaarmata.

Powered by Labrador CMS