Barcelonap nunarput alutoraa

Tallimanngormat Barcelonami takornariaqarneq pillugu ataatsimeersuarnermi Nunatsinnit takornarianut quppernerit nittartakkat iserfigineqartarnersaat ilisaritinneqarput, tamatumani sammineqarlutik digitalikkut tusagassiorfiit, soorlu quppernerit nittartakkat, ussassaarinerit imaluunniit teknologi nutaaq.

Nunatsinnit peqataapput Ella Grødem aamma Mads Lumholt, marluullutik Visit Greenlandimeersut, taakkualu saqqummiuppaat greenland.com ussassaarinerlu Big Arctic Five, qallunaat tusagassiorfiisigut oktobarimi novembarimilu ingerlanneqartoq.

-Peqataasut isumaqarput qanoq isumassarsiornartigisoq kusanartulerinermik sunniutissanillu samminninnerujussuarnerput, inuillu isumaqarput eqqorluinnartumik iliortugut website-rpullu ussassaarinermullu site-rput nersualaartorujussuullugu. Arlallit torrallageqaat nuna inukitsoq Kalaallit Nunaattut ittoq qanoq isilluni atugassarisat sulisullu taama ikitsigisut atorlugit taama kusanartigisumik sanasinnaasoq, Ella Grødem Barcelonamit oqaluttuarpoq.

Tivanermik takutitsivoq
Saqqummiussinermut atatillugu Mads Lumholt aamma tivanermik takutitsivoq, Visit Greenlandimilu sulisut taakkua marluk naapertorlugit tamanna inunnik attuivoq, aallarniutaalluarsimallunilu nassuiassallugu Kalaallit Nunaat ilaatigut ussassaarutigineqartoq takornarianut pinngortitap kulturillu sunniisinnaanerat misigisaqartitsisinnaanerallu atorlugit.

- Uagutsinnut tulliulluni saqqummiussisup assersuutigaatigut imarisaa tiguartinnartuussasoq misigissutsinilu qaffakaatitsilluni. Ulloq manna sioqqullugu Kalaallit Nunaat eqqarsaatigisimanngisaannarsimavaa, saqqummiussinittali kingorna maanna pingaarnersaatilerpaa, taamaattumik sunniuteqarluarsimavoq, Mads Lumholt iluarinnittoq nuannaartorlu oqarpoq.

Isumassarsisinneqarput paasisaqarnerullutillu
Siullermeersumik Digital Tourism Innovation Campus ingerlanneqarpoq, aaqqissuisullu malillugit iluatsilluarsimavoq.

- Peqataanerput ilinniarfigilluarsimaqaarput. Sumiiffinnik online-mi ussassaarinermi suut sammineqartut pillugit isumassarsisinneqarlutalu paasisaqarneruvugut. Ilinniarfigisimavarput sumunngarfiit allat qanoq iliornerat, ussassaarinermilu qanoq iliunnginnissamik siunnersuutaat, sulilu pingaarnerusumik isumaqatigiissutinik pitsaalluartunik pissarsisimavugut, Ella Grødem oqarpoq.

Angalaffissanit assigiinngitsunit 80-init katillugit 130-t ataatsimneersuarnermi qaaqquneqarsimapput, taannalu tallimanngormat ualikkut naammassivoq.