Doris attuumassuteqanngitsunik misissueqqusivoq
London Miningip ingerlatseqataata SNC Lavalin-ip peqquserlunnermik mamianartuliorfigineqarnerata kingorna Doris Jakobsenip piumasaraa saviminissamik suliniutip akiliersinnaassusia nutaamik attuumassuteqanngitsumik misissuiffigineqassasoq
Siumut tunuliaqutaralugu folketingimut ilaasortap Doris Jakobsenip piumasarilerpaa London Miningip Nuup Kangerluani saviminissamik suliniutaata akilersinnaassusia nutaamik attuumassuteqanngitsumik misissuiffigineqassasoq.
Taamatut piumasaqarpoq pissutigalugu London Miningip ingerlatseqataa SNC Lavalin, saviminissamik suliniutip akilersinnaassusianik misissuisimasoq, peqquserlunnermik mamianartuliorfigineqarnerata kingorna.
- Ilumut upperisinnaavarput SNC Lavalin - uppernarsaatinik peqquserlussimasutut, peqquserlussimasutut akileraarutitigullu peqquserlussimasutut unnerluutigineqartoq - Naalakkersuisunut eqqortunik paasissutissiisimasoq, Doris Jakobsen tusagassiorfinnut nalunaarutikkut aperivoq.
Atuaruk "London Miningip ingerlatseqataa peqquserlussimasoq"
- Assersuutigalugu London Miningimit akilersinnaassutsimut misissuinerit upperisinnaavagut, tamakkua SNC-mit suliarineqarsimammata? Tamanna nalulluinnarparput - aamma immikkut ilisimasalinnit misissortissinnaanngilarput, tassa Naalakkersuisut oqarmata akilersinnaassutsimut misissuineq isertuussaasoq, Doris Jakobsen oqarpoq.
- Matoqqasumik ingerlatsisoqarunnaartariaqarpoq. Suliniussuarnut inatsisip iluamik suliarinissaanut piffissalertigut, selskabit SNC-tut ittut, peqquserlunnissaminnik tunuarsimaanngitsut, tusaaniaannarnagit, Doris Jakobsen oqarpoq, erseqqissarlugulu SNC Lavalin-imut unnerluussinerit nutaat isigigini suliniussuarnut inatsisip, sapaatip akunnerani tullermi aappassaaneerneqarlunilu pingajussaaneerneqartussap, akuersissutigineqarnissaata kinguartinnissaanut tunngavilersuutissaalluartutut.