Nuna tamakkerlugu taamaatitsinerit
Anorersuarneranik apineranillu timmisartuussineq eqqorneqarpoq. Kujataanut, kujataanit kujataatalu iluani timmisartornissat tamarmik taamaatiinnarneqarput, nunali tamarmi eqqorneqarpoq, Air Greenland paasissutissiivoq
Nunap annersaani anorersuarneratigut apineratigullu timmisartuussineq sakkortuumik eqqorneqarpoq.
Taamaasilluni kujataanut, kujataanit kujataatalu iluani timmisartornissat tamarmik taamaatiinnarneqarput, Air Greenland paasissutissiivoq.
Tamanna peqatigalugu Nuup Kulusuullu akornanni ullumi timmisartuussinissaq taamaatiinnarneqarpoq.
Aamma Avannaani Uummannami Qaanaamilu timmisartuussinissat taamaatiinnarneqarput.
Timmisartorsuarli Kangerlussuarmit Københavniliarluni aallarpoq, aatsaalli akunnernik pingasunik kinguaattooreerluni.
Kujataanut, kujataanit kujataatalu iluani timmisartortussat nalunaaqutaq 18.00 erseqqinnerusumik paasitinneqarumaarput.
Nalinginnaasumillu ilaasut tamarmik pilersaaruteqaliinnavippat paasissutissinneqassapput, Air Greenlandimi sulisoq Pia Christensen Bang Sermitsiaq.AG-mut oqarpoq.
- Silap guutii ersarivissumik Air Greenlandimi sulinngillat aammalu selskabimik atuisartuunatik, Air Greenland Facebook-imi quppernermini allappoq.