Kujataani ulussaarsuarnissaa aarlerisaarutigineqartoq
Nanortalimmi aqagu ullaakkut anorersuassaaq ulussaarsuarneratut sakkortussusilimmik anoraasuartartumik. Anoraasuartarnerata sekundimut 50 meterinik sukkassuseqarnissaa DMI-mit ilimasaarutigineqarpoq
Nanortalik Kujataanilu sumiiffiit allat tallimanngornermi ullaakkut anorimit sakkortoorujussuarmit eqqugaassasut DMI ilimasaarivoq.
Nanortalimmi anori sakkortulluinnassangatinneqarpoq, tallimanngornermi ullaakkut nalunaaqutaq arfernup qulingiluallu akornanni anori agguaqatigiissillugu sekundimut 30 aamma 35 meterit akornanni sakkortussuseqassangatinneqarpoq, anoraasuartarneranilu sekundimut 50 meterit angullugit sakkortussuseqarsinnaassangatinneqarluni.
Anorip sakkortussusaa sekundimut 28,5 aamma 32,6 meterit akornanniikkaangat sakkortuumik anorersuarneratut oqaatigineqartarpoq, tassanngalu sakkortunerugaangat ulussaarsuartut taaneqartarluni.
Allaaserisap matuma qulaani anorip qanoq innissaanik ilimasaarut takuuk.
Ilimasaarutit malittarisinnaavatit uani.