Inuusuttut namminiilivinnissamut aqqutissiuussisut

- Namminiilivinnissap qanoq anguneqarnissaanik inuusuttut takutitsinissaat nunatta atorfissaqartippaa. Namminiilivinnissaq anguneqarsinnaanngilaq aperaluni nunagisaq qanoq iliuuseqarsinnaanersoq. Takutinneqassaaq inuttut nammineersinnaassuseqarnikkut akisussaassuseqarnikkullu, Avalaap siulittaasua Hans Peder Kirkegaard oqarpoq, pitsaanerusumillu iliuuseqarnissamut inuusuttut nunarput isumassarsisittariaqaraat isumaqarluni.

Avalaap 2013-imut kalaallit Danmarkimi ilinniagaqartut Danmarkimi ilinniagaqarnersiutinut SU-mut nuunnissaannut periusissamik suliaqarnissaanut atatillugu takorluukkamik tamatuminnga Hans Peder Kirkegaard ersersitsivoq.

Taanna isumaqarpoq inuiaat kalaallit sivisuallaamik utaqqiinnarpallaarsimasut:

- Namminiilivinneq uatsinni namminermi aallartissaaq. Inuiattut sivisuallaamik utaqqiinnarpallaarsimavugut. ‘Pisortatigoortumik iliuuseqartoqarnissaa’ utaqqisarparput. Ilinniagaqarnersiutitta qaffanneqarnissaat utaqqisarparput, pisassiissutit qaffanneqarnisssaat utaqqisarparput, pisortat uagut pilluta iliuuseqarnissaat utaqqisarparput. Isiginnittaaseq tamanna qimanniarpara. Utaqqiinnassanngilagut. Aningaasanik amigaateqarutta namminerluta pissarsiariniassavavut, ingerlaqqippoq.

- Pigisavut aallaavigalugu sapinngisamik pitsaanerpaamik iliuuseqarniarta. Pigisavut arriikkaluartumik amerliartussapput, erseqqissaavoq oqarlunilu Kalaallit Nunaata nukittuutut namminiilivinnissaanut aqqutissaq ataasiinnaasoq.

- Namminiilivinnissamut, Kalaallit Nunaata nukittunerulernissaanut, aqqutissaq ataasiinnaavoq. Tamannalu pissaaq inuttut nammineernerulernikkut, inuttut nukittunerulernikkut. Periarfissaq alla sunaava? Perusutatsinnut tamanut akissaqalerniassagatta uuliasiornermik aatsitassarsiornermillu suliffissuaqarnerup aallartinnissaa utaqqivarput. Utaqqivugut. Tamanna upperinngilara.

Avalaap periusissaanut takorluugaanullu ilanngussassatut siunnersuutissaqaruit Avalaap tusarfigerusuppaatit avalak@avalak.dk aqqutigalugu.