Tartupaluk pillugu aaqqiagiinngissut ingerlaannarpoq
Nunatta Canadallu akornanni imaani killeqarfiit nutaat inissipput, qeqertamulli aaqqiagiinngissutaaqisumut Tartupalummut tunngatillugu aaqqiagiinnginneq ingerlaannarpoq
Sivisuumik oqallittoqareersorlu Kalaallit Nunaata Canadallu akornanni imaani killeqarfiit ersarissumik inissinnissaat naalakkersuinikkut isumaqatigiissutigineqarpoq, taama nalunaarpoq Danmarkimi nunanut allanut ministeri Villy Søvndal SF-imeersoq Canadami ministereqatiminut John Bairdimut tikeraarnermini.
- Ulloq manna (pingasunngornermi, aaqq.) angusat naammagisimaaqaakka. Taamaalilluni sivisuumik suliaasimasoq naammassineqarpoq killeqarfiillu inissillutik, Villy Søvndal oqarpoq.
Isumaqatigiissut 'ersarissumik oqariartuuteqartoq' isumaqarpoq, sumiiffimmi aalisarnikkut aatsitassarsiornikkullu killeqarfiit inissinniarneranni iluaqutaasussamik.
- Isumaqatigiissuteqarnitsigut tamanut uppernarsivarput Issittumi ajornartorsiutit isumaqatigiinniarnikkut aaqqinneqarsinnaasut, nunanut allanut ministeri oqarpoq.
Aamma isumaqarpoq Kalaallit Nunaata Canadallu imaani qeqertaq aaqqiagiinngissutaaqisoq Tartupaluk pillugu oqaloqatigiinnerit ingerlaqqinnissaannut 'pitsaasumik aallaavissaqalersoq'.
Læs "Klar til grænseforhandling med Canada"
Aaqqiagiinngissut 1973-mi aallartippoq, taamanikkut Canadap Kalaallillu Nunaata killeqarfii inissinneqarlutik.
Kingorna Canadamiut qallunaallu qeqertamut tikeraartarlutillu piginiartarpaat, taamaaliornikkut nunat taakku marluk akornanni aallartitaqarfiit akersuutilerlutik.
Tartupaluk pingaaruteqarlualersinnaavoq ilaatigut Canada avannaqqullugu Manerassuarmut imaatigut aqquteqalerpat.
2005-mi nunat taakku marluk akornanni isumaqatigiissutigineqarpoq killeqarfilerngusaanneq aaqqinneqassasoq. Kingorna Canadami Danmarkimilu nunanut allanut ministerit aaqqiagiinngissut iluarsiniartarsimavaat.
- Oqaloqatigiinnerit (Tartupaluk pillugu, aaqq.) torersumik pitsaasumillu ingerlanneqarput, maannangaarli oqaatigineqarsinnaanngilaq qaqugu naammassissanersut, Villy Søvndal oqarpoq.
- Ullumikkulli isumaqatigiittoqarneratigut uannut uppernarsarneqarpoq angusaqartoqarsinnaasoq, nunanut allanut ministeri oqarpoq.
Isumaqatigiissummi pineqarpoq imaq 3000 kilometerinik isorartutigisoq. Killeqarfik Kalaallit Nunaata kujataaniit Davis Strædikkut, Baffinip Kangerliumarngatigut, Ikikkut nerukitsukkut, Kennedyp Ikeratigut Issittullu avannaatigut Kalaallit Nunaata avannaanut ingerlavoq.
Isumaqatigiissuteqarnikkut 1973-mi killeqarfiugallartut taarserneqarput, isumaqatigiinniarnerillu kalaallit suleqatigilluinnarlugit ingerlanneqarput.