Qallunaat pilluarnersaaqqipput
Misissuinerup allap takuteqqippaa qallunaat inuianni pilluarnersaasut siunissamullu isumalluarnersaasut
Tupaallaataavannaarunanngilaq Danmarkimi inuiaat pilluarnerpaatut nalilerneqaqqinnerat.
Eurofound-ip, inuuniarnermi sulinermilu pissutsinik misissuisup, nalunaarusiaani nunanit EU-mut ilaasortanit 27-nit tamanit qallunaat inuiattut pilluarnerpaatut siunissamullu isumalluarnerpaatut nalilerneqarput.
Qallunaat quliugaangata arfineq-pingasut siunissamut isumalluarput, europamiut nalinginnaasumik affaannaat siunissamut isumalluartut.
Robert Anderson-imut, Eurofon-imi inuuniarnerup qaffasissusianut pitsaassusianullu immikkoortoqarfimmi pisortamut, tupaallaataanngilaq qallunaat europamiunit pilluarnersaanerat.
- Danmarkip taama siuarsimatigineranut pissutaasut assigiinngitsorpassuit ataqatigiinnerat pissutaavoq, nalunaarusiap Bruxellesimi tusagassiortunik katersortitsilluni saqqummiunneqarnerani Anderson oqarpoq.
- Ilaatigut peqqinnissaqarfiup pitsaassusia, qallunaat akornanni tatigeqatigiinneq, piumassutsiminnik ikiuiniarlutik sulisartut amerlassusaat naalakkersuinerlu.
Misissuineq naapertorlugu Danmarki nuna tatiginniffiunersaavoq. 1-miit 10-mut naliliissut atorlugu qallunaat akipput allanik tatiginninnertik 7-miittoq - EU-p sinnerani 5,1-imiittoq.
Naalagaaffimmut naalakkersuisunullu tatiginninneq qiviaraanni qallunaat 5,7-imiipput. Immaqa qaffasippallaarpasinngikkaluartoq agguaqatigiissitsinermit 4,0-mit annertunerungaatsiarpoq.
Qallunaat sisamararterutaat oqarput gruppit ikinnerussuteqartut akornanni pissanganartorsiortoqartoq, europami inuit tallimaagaangata marluk taamatut oqartut.
Tamanna peqatigalugu europamiut pingajorarterutaanit amerlanerusut pisuut piitsullu aaqqiagiinngissuteqarnerarpaat, qallunaat 4 procentiinnaat taamatut isumaqartut.
Robert Andersonip erseqqisarpaa pilluarnitsinnut inuttut naleqartitaannaat sunniuteqanngitsut. Aamma aningaasaqarneq pissutaalluinnarpoq.
Tamatumanissaaq Danmark pitsaasumik immikkooruteqarpoq. Misissuinermi qallunaat 3 procentiinnaat oqarput aningaasaqarniarnermikkut ´ajornartorsiuteqarlutik´nunani EU-mut ilaasortani 27-ni tamani kisitsit taanna 17 procentiusoq.