Kalaallit kulturiat USAmi pikialaarutaassaaq

Nanook, Rasmus Lyberth aamma Miké Fenker Thomsen tassaapput kalaallit februaarimi marsimilu amerikamiut illoqarfiisa pingaarnersaanni takutitsisussat ilaat

Nanook, Frederik Elsner siuttoralugu februaarimi marsimilu Amerikami illoqarfiit pingaarnersaanni tiguaassaaq. Assi: Leiff Josefsen

2013-imi februaarimi marsimilu atuakkiortut, erinarsortartut, igasut, nipilersortartut, isiginnaartitsisartut, qitittarut aamma ilusilersuisartut nunanit avannarlerneersut Washington D.C. katersuutissapput.

Aatsaat perngaamik USA'mi kulturikkut illorsuit annersaata Washingtonimiittup ’The Kennedy Center’ - nunani avannarlerni eqqumiitsuliornermit, kulturimit aamma inuiaqatigiit inuunerannit takutissinnaasaminnik pitsaanerpaanik takutitsivigissavaat. Tamanna pissaaq kulturfestival ’Nordic Cool 2013’ ingerlanneqarneranut atatillugu, tamaani eqqumiitsuliortut 700-nit amerlanerit Nunanit Avannarlerneersut ilaallutik Kalaallit Nunaat, Åland aamma Savalimmiut peqataaffigissavaat.

Nunatsinnit atit

Kalaallit Nunaannit nipilersoriartitaassapput Nanook aamma Rasmus Lyberth, isiginnaartitsinermik eqqumiitsuliortartoq Jessie Kleemann aamma assiliisoq Jørgen Chemnitz tamarmik oqallitsitsinerni assigiinngitsuni peqataassallutik. Isiginnaartitsisartunngorniaq Miké Fenker Thomsen savalimmiormiut nipilersortartui Yggdrasil peqatigalugit aliikkusersuissasoq.

Sapaatit akunneri sisamat atorlugit amerikamiut kulturikkut aamma ilusilersuinerup silarsuaannit aliikkusersorneqassapput. Nordic Coolimi aamma neqeroorutigineqassapput Nunani Avannarlerni nerisassioriaaseq nutaaq, pikialaartitsinerullu nalaani nutaartatut nunani avannarlerni inuiaqatigiit politikkikkut pingaartillugit isiginiagaat soorlu avatangiiseq, naligiissitaaneq, meeqqat aamma inuusuttuaqqat, akuutissalersuineq aallaaviginagu naatitsineq siuarsaanerlu aamma sammineqassapput.

Uani allanik atuagassaqarpoq

Powered by Labrador CMS