Qalerallit tulaassorneqaqqissinnaalerput
Arfininngorpat Qeqertarsuup Tunuani aamma Upernaviup aqutsiveqarfiani umiatsiaararsortut qaleralinnik tulaasseqqissinnaalissapput - Uummannamili tunitsivik matoqqaannassaaq
Arfininngorneq ulloq 1. december 2012 aqutsiveqarfinni pingasuni umiatsiaaqqamik qaleralinniarnermi qaammammut pisassiissutit 50 tons aalisarneqarsinnaalissapput.
Aqutsiveqarfimmi Uummannami qaammammut pisassiissutit 50 tons aalisarneqarsinnaalerneranit pisassiissutit sinneruttunut suli amigarput. Taamaattumik aqutsiveqarfimmi Uummannami umiatsiaaqqamik qaleralinniarneq matoqqaannassaaq, Kalaallit Nunaanni Aalisarsinnaannermut Akuersissutinik Nakkutilliisoqarfik ilisimatitsivoq.
Qaammammut pisassiissutit decemberimut 50 tons aalisarneqarsinnaalerneranniit aqutsiveqarfinni pingasuni umiatsiaaqqamik qaleralinniartunut pisassiissutit sinneruttut imaapput:
- Qeqertarsuup Tunua: 42 tons
- Uummannaq: -7 tons
- Upernavik: 53 tons
Angallatinut miiterit arfinillit qaangerlugit angissusilinnut pisassiissutit sinneri imaammata:
- Qeqertarsuup Tunuani 501 tons
- Uummannami 261 tons
- Upernavimmi 197 tons