Telep telefonit nalinginnaasut internetilu immikkoortilerpai

Telep piumasani pissaguniuk internetteqarniaruit pinngitsoornak oqarasuaammik nalinginnaasumik peqaqqaartariaarutissaatit

Telemi atuisut akiliutitik atorlugit internetimik atuisinnaanerulissapput, Telep qinnuteqaataa Nalunaarasuartaateqarnikkut aqutsisoqarfik akuersippat. Foto: Polfoto/Thomas Borberg

Telep nalunaarasuartaateqarnermi aqutsisunut qinnuteqaatigaa, telefonit nalinginnaasut internetillu avissaartinnissaat, taamaalillutik atuisut internetimik atuilerniarunik telefonimik nalinginnaasumik peqaqqaartariaarullugit.

Taamannak Telep pilersaaruteqarneranut pissutaavoq ullumikkut atuisut oqarasuaammik atuinerat internettimik atuinerannit annikinnerujussuanngornikuummat.

Telep qinnuteqaatini pillugu nalunaarasuartaateqarnermi aqutsisut akuersinissaat utaqqiinnartariaqalerpaa, atuisut inuiaqatigiillu kissaataat piviusunngortikkumallugu.

Aammattaaq qinnutigineqarpoq nalinginnaasumik telefonimik aamma internetimik atuisunngornermi akiliut 1.000 kr.-imiit 500, kr.-imut appartikkumallugu.

Ungasinngitsukkut Telemit nalunaarutigineqarpoq GOLD-imik Premium-imillu atuisut akit allanngortinngikkaluarlugit 2-3-riaammik atuilersinnaanissaanik qinnuteqaat nassiunneqatsiaannartoq.

Powered by Labrador CMS