DF: Kalaallit Nunaat nunamut oqartussaaneranik arsaarneqartariaqarpoq
Dansk Folkeparti oqaaseqaateqarput: Folketingimut ilaasortaq Naalakkersuisunik sakkortoorujussuarmik isornartorsiuivoq, taallugit tassaasut perorsaasut ajunngitsumik isumallit ilinniartitsisullu
- Kukkorujussuarneruvoq Folketingit Dansk Folkeparti peqatiginagu, aatsitassarsiorsinnaanermut allatulluunniit nunap ataanik pisinnaatitsissutinik tunniussinerat. Kisianni Folketingip suna tunniunniarlugu aalajangersimaguniuk aamma uterteqqissinnaavaa, Dansk Folkepartimeersumit Morten Dreyer-imit uani blogindlæg allaaserisami takuneqarsinnaavoq. Taanna Folketingimut qinigassanngortissamaarpoq aamma Fragør Kommunemi kommunalbestyrelsimut ilaasortaavoq.
Morten Dreyer naapertorlugu Kalaallit Nunaat nunat tamalaat akornanni ingerlatsivissuarnik - Kalaallit Nunaannut aamma Naalakkersuisunut iluareqqusaartunik isumaqatigiinniarnissaminut piginnaasaqanngilaq.
- Naalakkersuisut politikerinit IA-meersunit aqunneqartut SF'imut assersuunneqarsinnaavoq. Tassa taakku naalakkersuisuuniat, perorsaasunik ajunngitsumik isumaqartunik ilinniartitsisunillu inuttalik, aatsitassarsiorfissuarnik angisoorsuarnik isumaqatigiissutinik atsiussanerlutik aalajangiisussaapput, Morten Dreyer allappoq.
Siornatigut anisitaareernikuuvoq
Naalakkersuisulli suliassaq tamanna artorpaat, Morten Dreyer, isumaqarpoq taassuma aamma oqaatigaa Naalakkersuisut ukiumut milliarderpassuarnik sianiinnaarneqassasut, tuluit oqaasii atorlugit eqqartuussissuserisut oqariartaasiinik atuarniarsarilerunik.
Taamaattumik Morten Dreyer tassa isumaqarpoq Folketingimit namminersorluni oqartussaanermik inatsit atorunnaarsinneqartariaqartoq:
- Folketingimit paasineqartariariaqarpoq Namminersorlutik Oqartussat namminneq ingerlatsinissaat kusanartumik anguniagaqaannarluni sinnattuaqilaarutaasoq, allakkami ‘Fratag Grønland undergrunden’ qulequtalimmi allappoq.
Morten Dreyer siornatigut partiimit Venstremit anisitaanikuuvoq.